by

Puisi “Reraya” Sofyan Griantara

Sofyan Griantara

Reraya

Kuparin denem ku pucuk ni uyem
Kutason galak ku cabang muselpak
Kutonen menet ku ranting mutinih
Kumanaten surak ku gelumang ujung nunang

Ulak   ulak   kekirengku ulak
Mudemu urum serinen berkekede urum sudere
Muberakahi sehebet ari Bintang ku Kebet
Ara ke ilen tekebir seringkel kute

Reraya . . . . .
Roa, tulu, opat  lao ku arap
Lagu si enge ku iyung aroma ni lepat
Lagu si enge mucecep delah ku lungi ni ragi

Ulak  ulak,  peranto bergerak ulak
Beriring naru ari Seulawah ku Cot Panglime
I lelah ni dene bersiturin kampung
Takengen, Bener Meriah, dis ne we Gayo

Ulak mi ulak peranto  entahmi ulak
Mampat nge bebedak so Tanoh Tembuni
Ike gere pe masir depik i Kelitu
Ara ilen waih terjun i Teluk Mengaya

Ulak woi ulak . . . . .  . Serinenku kite bergegalak
Enge musapat until, biak, urum kumpu
Degur ni mesin sarik berderu
Kune akal iyoni kami bebuke i duduk ni tenge ni Ine

Reraya   .  . . . .  .
Resam ber resam
Resam ni si muranto mukale kin Lut Tawar

Penghujung Ramadhan1433 H

Biodata : Sofyan Griantara, Urang Gayo berdomisili di Banda Aceh

 

Comment

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.