Karya, Cut Azza Devi s.*
Basa ..
Peri Mestike rum tutur kata
Warisen ari jemen pudaha
Ku kite ara ilen rasa
Gere neh dele, Taring sara roa.
Peri …
Simen ke ilen si peduli
Ara ke ilen si mengerti
Kunede kase basa ni
Sawah kede mien ku generasi.
Dele rempak lale pebening
Nge muloi taring basa besiloni
Sisekulah si paling genancing
Gere neh ekeng kin basa diri.
Basa ni jema nge surang saring
Teba nge giging, belejer kuso kini
Basa diri i daten tareng
Ta mukene, keta nge kite ni?
Cerak ..
Pantas ke bumi ilen i jejak
Pantas ke langit ilen i jujung
Seringkel tapak nge mupuntung
Seringkel payung taring cerite.
Ooo biak, woo biak ku ine ..
Mamor laoh ku dagu
Sebuku bayak bajungku
Gelah mi mongot kao biak ku
Tungkuk pebening wan jejunten atu.
Oo biak, wooo biak ku ine …
Kusi, i kadun nasip pe ..
Kusa de, besere
Kune de kase akhire.
Tareng cerite kin sejarah,
Atau sawah ku generasi puren.
Ooo urang gayo …
Gelah mi rempak kite morom
Sesilen pumu ni baju
Beramik pumu, kite musara
Mujege basa peri mestike
Edet budaya kite lestarin
Gelah mumpedirin kao urang gayo
Ngok ken nyanya, wan edet diri
Ari pada mureta , tape gere mu arti
Gelah muninget mi kite,
Belang berpancang
Uten bertene
Denie terlangis
Nahma teraku…
*Penulis Adalah Juara Puisi Bahasa Gayo Festival Tunas Bahasa Ibu (FTBI) Bener Meriah.
Nama : Cut Azza Devi S.
Nama Ayah : Muhamad Salim
Nama Ibu : Deyenni Elvita
Asal sekolah : SMA N UNGGUL BINAAN BENER MERIAH
Pembimbing: Latifah Elviana S.Pd