Takengen | lintasgayo.com- Kasmira Fatra rayat biasa. Sebagai urang gayo Kasmira tereh bahasa gayo osop mari i baca sara berita, berjudul ” Bahasa Gayo Terancam Punah”.
Cop wan kekire e , mayo koan amale . ” Sana diye si pas kubueten munyelamaten bahasa gayoni, beta kata olehe.
Mokot Kasmira Aman Nuger pebening. ” Aku gere pane nulis. Sana de si nguk kubueten”, beta cerak wan atewe.
Tekedir Allah, waktu tengah munyapu sara tempat i Lot Kala Kebayaken, iengonne buku tentang cara munos komik.
“Eh, ini bang si nguk kubueten”, beta wan kekiri dirie. Renye i telponne adik iparre si tareng i Kelupak Mata. Bergeral Agus Santoso.
“Dik dik. Nguk ke tosko komik. Cume nti bepikir soal sen mulo”, geh kene Kasmira wan telponna.
” Nguk bang ” jeweb adik e ne. Renye muloi tos pake roani komikne. Agus Santoso munos gambare. Aman Nuger munyusun kekatae.
Sekiter opat bulen komik beratus alamanni munge. Ara ide tosen tikik. Beta renye selanjutte.
I seder Kasmira tujuen komik berjudul Resam Berume ni kekanak sekulah dasar. Karena menurutte, bahasa gayo paling terancam gere i pake ne i kalangan kekanak.
” Anak SMA urum SMP ara ilen bebasa gayo jarang jarang. Ike anak SD lagu nge basa Indonesia bewene”, kene.
Setelah munge, berusahalah Kasmira munyetak komikni. Usul kukantor Dikjar. Demui dele jema si kire kire pas mubantu.
“Sawah pitu tun ihtier munyetak komik gere berhasil ilen”, geh kene, olok uwes. ” Cerak munyelamaten basa gayo ketebah pelin”, kene mien.
Menurut Kasmira Fatra Aman Nuger. Sediken murezeki, gere pejeje jeje we mungenal dinas terkait kin munyetak komikni. Ternyata bewene omong pesot.
Sri Wahyuni, salah sara aktivis jema banan mumenge ceriteni berinisiatip munyetak komikni secara gotong royong.
Sri Wahyuni mumakati jema si peduli dan simpati kin perjuangan Aman Nugerni mungemoli sen tetikiken. Sediken gere ara tanggapan ari pemda.
Jemat kelam, (31/10/2025) , Kasmira Aman Nuger i talu Podcas Lintassgayo ilang ku studio i Belang Kolak Due.
Wan cerak Podcas a , i ungerni Aman Nuger Peri Mestike gayo, “Tetok gere mutulen. Sikit gere berusi. Emping nge ara. Uah gerara”.
(Aman Shafa)