Bayak ku……. Oleh : Ine Koel Cobat
Anak ku siwah bulen kau wan kandungen
Gere ku inget kune letih ni beden
Bier gaeh pungi urum uren
Bise pe sekujur tubuh turah ku gingen
Alhamdullilah kao sehat lahir ku dunie
Urum senang niate ku samut suke cite
Ku taos geral mu kati mampat lagu bunge
Kin pongot mu penamah ni ine bahgie
Anak ku bier aku berkejang payah
Buge anak ku nguk sekulah hinge kuliah
Gelah porak lao kelam aku mumerah
Buge anak ku puren mujadi sarjana turah …..
Tapi…..
Besilo nge mulaen ate mu kin aku
Wan ues ni ate mejen aku bersebuku
Bier aku bertikon puren kase ralan ku
Gere ku harap kin penosah mu
Wan ues ni ate aku sabe macik
Wan temas bahgie aku sabe bimang
Turah penge ko ke kase kalang pukekelik
Baro kao anak ku sawah ku batang ruang
Bier ralan ku besilo nge kiding semelah
Bier ralan ku mejen turah betatah
Ike kin murip ku sangup ilen ku kenal nafkah
Gere aku anak ku pumu ku tadah
Gelah aku ber ues ate besiloni
Ike ate ku kin kao gere ubah janyi
Bier runtuh langit urum bumi
Dak ku singkih kuen aku penanti
Wassalam ari aku anak ku…..
Aleckave Bersah:
Bouh mi ineku…
Gelah ku sauti laing ni inea..
Ine…
Gere male kusipet orom kayu naru
Gere male ku seta orom konot ni pumu
Kaul ate ni ine kin kami anakmu
Kasih sayang ni ine gere mera buntu
Ine…
Kin kasih ni ine kami gere lupen
Sabe mubayang wanni ingeten
Doa sabe kami tiro ku tuhen
Buge ine jeger tubuh beden
Ine…
Asal dele ni kami teniron
Ari batang mejen turah i jelgitten
Ari awahpe mejen i tangkuhen
Beta kaul ate ni ine kin kami rupen
Ine…
Gere mera mubah ate kin ine
Gere teganti kasih sayang si kami terime
Bier mulimpah harta orom bene
Bier muganti kelem porak lao
Ine…
Ara we kase kami lale
Keber ni ine kukami gere musampe
Ari kerna sibuk buetpe dele
Nge mujadi rinu denem wan ate
Ine…
Berijin keta kami ucepen
Semah sujud ni kami buge i terimen
Kao we sara gere pat gantinen
Bier pe ine nge singkih kuen
Jus Anri:
Bier ine dele jasamu
Enti i sebukui rasa uwes ni ate
Buge budakni ninget ken jerih payahmu
Kedang tuhen gere ilen ukenne ate we
Si prin ine bewene nge ku baca
Ara sara roa nguk ku maklumi
Ike ken ine tetap kami sawahen doa
Bugemi ineku gere olok i tangisi
Kami betih ine sangup ngenal nepekah
Bier ine muralan urum kiding semelah
Gere male lupe anakmu ini karena nasibku
Doakan kami ine kati sawah men ku pangkuanmu
Ecek Suku :
Kasih ni ine sigere mera metus
bier pe rembege singe lagu langus.
Kasih mu ine kin buah ate jantung limpe
wan emis ni mata nge turah jege.
Kasih ni anak kin jema tue gere sawah
lagu kasih ni nami simu basahi ulung semelah.
Kasih ni anak kin jema tue kerna reta orom repie
Dele ipante jumpo tetue sikite erah
Anak e jema megah alassen ine ijumpo temas beribadah.
Kune keta.
Bahtiar Gayo:
Wo tajuk rejeku……!!!!!
Siku kubantelen penemis nome
Ate gere rane mubayang rupemu
Gerle aku menge denyet ni tete
Mamang langkahku munuke pintu
Mera pu gegerle timul ni nipi
Beden si lesi murelas kurasa
Nume beles jasamu si kami kalei
Nume tenemeng pumu jurah ni reta
Porak lao kelem kami berdoa
Tuhen sisara taonku mungadu
Jarak mi bele selisih mara
Buge semperne bahgie muripmu
Sediken kami italu si sara
Enti imelasi ko beluh ni nyawa
Nge sawah masa munaring donya
Ku alam baqa munantin masa
