Tetah Peden
Oleh: Hasrin Z Bersah
Jamut ni pumu sesabi kuen
Enti se lupenen pumu si kiri
Ikepe kase bersitulaken
Mehat ada ilen si munegu sarami
Gelahta mata padehne bersijorengen
Sikerna penengenen mera i tamahi
Ke makin awah asa taon silep lupen
Meradi sisawahen mulaen rum siperi
Ike demu kuduk keta bersiserenen
Siringen tulen enti muberati
Merawe beden kase gere tehen
Enti nye tulaken gerene gunei
Mumulotu langkah wanni perjelenen
Enti renye taringen sitengah berasi asi
Alih ni kiding gere muketentuen
Si mulo terpuren galip penampi
Mata munerah mera salah engon
Sipatut kin lewen nge i amiki
Paong sara janyi i lupenen
Renye berulon ulon rum bebayang diri
Biasa kemaro mudepeti uren
Taon pelongohen renye itetahi
Kuyu bade mera gere besinen
Bubung sipasangen enti orop mupari
Betawe bintang asa urum ulen
Bergegantinen cahya si depeti
Kati lepas kin penerang ni jelen
Turah musara peden enti kekendiri
BandaAceh, 12 Juli 2020
