Takengon | lintasgayo.com- Tengku Abdurrahim Daudy, lahir tun 1910 i Kebayakan, Aceh Tengah. Penalun Teungku Abdurrahim Daudy si populer Teungku Mude Kala.
Geralni Teungku Mude Kala lebih Meshur kerna dele Saer situlisse i bobohe geral ini ne. Teungku Abdurrahim Daudy anak Siulu bere ari Ama Tengku Daud den Ine Jemi’ah.
Dengan urum serinen Teungku Mude Kala oyale, Samiala Inen Cut, Banta Cut Dailany, Bantara Syam den Sulaiman Daudy.
Anak Teungku Mude Kala ara siwah jema ari roa mpun umahe. Salah sara anakni Teungku Mude Kala , Rumbiana Ardy , tareng i Belatu Takengen.
Rumbiana Ardy Inen Chairunnisa gati i entong jema mungunei sejarah Teungku Mude Kala, kin keperluen Skripsi, berita, sejarah den silene
Zulfadlin Syawal, kumpu Teungku Mude Kala, anak kedue Rumbiana Ardy , munyeriten bahwa ara beberapa naskahmi we ari karya awan alekke Teungku Mude Kala si kemas ni Ine e.
Ara mungkin naskah naskah silenna i anak anak ni Teungku Mude Kala.
Naskah Teungku Mude Kala i Ton Sampah
Iceriten Zulfadlin Syawal, ara kisah sedih ari naskah ni awan alekke ni. Naskah ni bekemas wan sara umah i Belatu Takengen. Umah inine i siwen ku jema.
Oleh si nyiwe umah Belatu ni, naskah karya Teungku Mude Kala itekarne kowan ton sampah. Salah sara jema urang Belatu munengon karya Teungku Mude Kala iwan ton sampah. Seba meh muterbang iyup kuyu.. Ikemulie dan iulaken singuk iselamatan.
“Ione dele karya ni awan Teungku Mude Kala ni osop karena itekar sinyiwe umahha ku ton sampah pasar inpres ,pudaha” kene Zulfadlin Syawal.
Buku karya Teungku Mude Kala si munulis tafsir Al-Qur’an kowan basa Gayo iterbiten i Mesir tun 1938.
Bupati pemulo Aceh Tengah, Abdul Wahab, bersedie mubiayai penerbiten buku tafsir wan basa Gayo, dekala oya.
Terinspirasi ari Teungku Mude Kala simunerbiten Tafsir Aquran urum hadits wan basa gayo 85 tun silalu, Teungku Dr Johansyah, munerusen buet jeroh Teungku Abfurrahim Daudy, hinge tangkuh Alquran Terjemahan basa gayo 775 halaman tun 2023 mane.
Teungku Dr Johansyah selain oya, male munerbitten Tafsir basa gayo si i baca urum cara saer karena lebih kona kuate. Buge
(Win Ruhdi Bathin)