Oleh. Drs. Jamhuri, MA*
Perkembangen manusia wan denieni, menurut sebagien jema nguk kite éngon ari cara muripé, ari segi ini ara tulu. Pertama jemen agraris, kedue jemen industri den ketige jemen transpormasi. Ari segi kepercayaen juge I bagi tulu tahapan perkembangen pemikiren den sara teologi, rowa metafisik den ketige positif. Si nomor dueni cuge kite pahami melalui tulisenni.
Pemulo pedih : Teologi, si perin teologi wan tahap pemuloni nume teologi Islam pelin tapi teologi umum kin bewené ejeren. Wan masa ini gere ara terbayang wan pemikiren ni jema tentang “sana kati”, miselné sana kati sakit tuke, sani kati murip nyanya, sana kati geli ate ni jema, sana kati gere pané sekulah, sana kati gere delé anak ni koro. Si betih jema wan masa ini bewené “kenakni Tuhen”.
Jema terih kin relas ni karang, cerunni tanoh, kerasni kuyu, peparni pungi, terih pedi juge ke wahni romme pangan tikus. Gere ara pikiren kune kati karang gerené murelas, tanoh gerené mucerun, senuenpé entine ara bele. Sehinge muripni jema dor wan terih den gere sanahpé tebueten (ke kené jema senni : gere mu ide), singuk bueten tiro ku tuhen jarakmi bele, enti ne sakit makit, senuenpé gelah jeroh muripé, gelah dele hasilé. Konotni cerite benné serahen ku tuhen, sana kené tuhen keta oya nge kin takdir.
Kedua : Metafisik, kepercaan bewené jema wan masa ini, bewené bene “lat bata kayu atu” atau “wih rara kuyu tanuh” ara mukekuten. Pola murip si lagu noya mokot wan sejarah ni manusie kekite baca-baca,akhiré manusie muloi berani, perasan terih kin penyakit nge muloi osop, banjir, bele ni kupi atau senuen lén nge nguk iatasi tetikik den kune akal enti mugangu. Cara sibuetni jema mubah, ke sebelume ongot munerime sana si géh, masa kedueni nge muloi ara usaha bierpé usaha si buet ni jema ara téba berhasil tapé juge ara si gagal.
Conto si nguk kite demun wan masyarakat Gayo mungkin gere gip beda urum daerah-daerah lén, miselne : Ike malé berume masyarakat Gayo biasaé munaran kenduri i ulu noweh, tujuen ibueten ini kati enti rerak si lalui wih bocor atau merelas, rom si kona wih jarak ari bele. Ike munuke empus juge iaran kenduri kena benné jema percaya uten si malé itebangan ara si mujegeié, demikien juge umah umpus tone torah metentu, enti sampé umah isesuken i lintesen ni paké alus. Gere ilen osop ari peningetente, tun 80-en ara temung kul i kampong kemili Takengen, dele jema mujule sesajén koné. Kadang apam kolak, kurik pangang, bertih den lén-lén, tujuenne gere ara lén, kati enti sakit makit den rejeki gelah mudah.
Kena pola pemikiren ni masyarakat si lagu noya, makaé benné sibuet ni jema perin tetue jemen ara hubungenné urum kekueten ghaib. Ike mungoa i kekanak enti tangkuh kekelam ari umah i perin ara apah, ike malé kuih use (kencing) perin enti sembarangen sebeb one ara makhluk lén si melén ari manusie. Nyap kusenni delé ilen kepercayaen ni jema, kuburen-kuburen den jema si nge benasa mera mungontak den biasaé ku jema kekanak, sehingge géh kene ine atau ananne “nge ya enti leweni kumpumu, sayang !”.
Cara si bueten kin munatasié biasaé urum rajah “tebes”, bun bere ni rara kowan berok si nge misi tanoh, kunulen ku atas ni cuci tangan si misi wih, renyel I tunu kemenyen den I bantu urum dowa.
Makhluk alus si mugangu jema wak kepercayaen ni urang Gayo dele gerallé, tergantung kubuet si buetan. Jema ke tengah mangan, mamur keroé ku atan alas atau lekat kukiding, geh kene tetue sapun gelah bersih cekak ni beno kasé. Cekak ni Beno artié ike jema méh mangan gere bersi alas atau kiding juge pakaianné ari kero simamur, kemudian renye nomé urum keroa kené tetue cekak ni Beno. Sebeb turah kite betihi mien, tengaha urah nurang Gayo gere ara mubeda ruangen mangan urum ruangen nomé, oya kati jema mera cekak ni Beno.
Jema cekak ni Beno, disné we urum jema kona cekak tengah jege. Cumen ke kona cekak tengah jege, berarti ara jema atau benatang lagu kule si menyekakné, tapi ke tengah nomé rasaé kona cekak, berarti ara makhlus alus si kite perin Beno.
Pemarin, Ketige : Positif, wan tahapen positifni nge muloi genap ilmu ni jema mubetihi denie. Nge betih jema ke sengkiren banjir den empus murelas berarti kayu-kayu si ara nge méh kona tebang, rerak ni ume kati bocor kena ara gerep mumah atau waktu nos rerak gere pedettu tanohé. Kupi nge muloi kurang wahhé kena gere rajin munebes atau mulelang, gedungé gere relemtu, pelongohné gere genap, den juge nge betih jema kune kati uwah ni kupi kati dele, berume pe gere setun seger né, nge nguk mutulun. Sebeb ke tengaha jeme gere berani berume seseréng kené dele bele lagu tumpit, berét den manuk len tamah tikus.
Séni gere ne delé jema si mubetih sana sebenaré Beno, kune cekak ni Beno. Kena nge kite kinni kekanak ke malé nomé basuhen kidding, gosok gigi, baca do’a ke nomé. Apakah kena oya kedie Benopé gere né ara, atau memang sebenaré Beno gere ara. Terlepas ari pecaya atau gere sijelas jema jemen nge cugeé cekak ni Beno. Den seni pé mera ilen ike kite kelpéten pumu waktu nomé, mera mukekéwék kulit i ralik kukut ni pumunte.
Ahirni melalui tulisenni malé kuperin ku kite bewenné, gere bewen jema minah ari tahapen pemilo, kedua selanjuté ku ketige. Ara ilen jema bepikir model teologi wan jemen positif, ara juge befikir metafisik wan positif, atau maduk tetulunné. Diantara sebebpé kati maduk, kena teori sitosni sebenaré ara kelemahanne den itos nume oleh jema Islam.
Wan pemahamen keislamen, gere terluahhi diri ari masalah teologi (keberadaan Tuhen), juge kepercayaan kin alam ghaib lagu malaikat, jin dan hari kiamat. Namun kite turah mubetihhi alam oya bewenné. Den si sangup mubantu kite mubetihiyé oya le ilmu pengetahuen.
