Tulisan ini cukup panjang. Tidak mungkin semuanya kami tulis. Mohon maaf, kami hanya mengambil beberapa ratus kata dari kata lain. Dalam tengkeh ini, ada juga yang belum memberikan komenter (balasan), seperti Mursyid Aman Qarib, Arjunaidi dan Sulaiman, karena itu kami mengambil dari syair-syair yang dibuat sebelum.
Demikian dengan Bahtiar Gayo dan Tunggel Belang, pada malam itu tidak membalas tengkeh, baru pada pagi harinya mereka memberikan balasan. Maka tengkehnya kami letakkan dibawah. Mohon maaf bila tidak semua tengkeh ini kami naikkan.(Red LG)
Amalah Ari Kenwat 
Wajah wajah si pane bertengkeh
Wan dunie maya olok di paseh
Panang nyata engon gelah sareh
Bugemi seni budaya gayo enti taring tempeh
Dele ilen geral e gere tersebut
Sipane bertengkeh silayak patut
Gelah budaya gayo enti surut
Murum kite petetah kati telas ujud
Murum kite berdoa
Kunul kite wan sara meja
Kite bahas seni budaya
Buge enti meh punah binasa
Bermohon maaf kutiro tabi ku serinen ku :
Arjunaidi AR
Aleckave Pengulu Bersah
Bahtiar Gayo
Jus Anri
Sulaiman
Eddy Fikri
Ecek Suku
Mursyid Aman Qarib
Abdul Wahab Daud
Tungel Belang
Irwansyah Doank
Hamdani Toa
Aleckave Pengulu Bersah :
Belejer munengkeh keta kamini
Muluahen kekata buge muarti
Tabi mulo kusi kuen kiri
Udah ara salah tulis luah ni peri
Ara kenak sigere ilen musampe
Sabe mulikep wanni ate
Kunul tepang rempak lagu re
Kati i tetah kase tempatte
(Amalah ):
Bewene kite ni turah belejer
Ari tetue si pane munemah keber
Lebih enti kaji kurang e gelah seber
Ibarat lao soboh mantong ilen eber eber
Berseni gayo mujege budaya
Kati enti osop sana siara
Kite pergunen dunie maya
Buge bergalak ate sahen si mubaca
Jus Anri
Soal budaya dele curake
Gendak ni kiding kune rempake
I jurahan syair urum itik itiken ne
Urum tepok ni pumu beberu e
Nengon lemut jejari ni beberu gayo
Urum seragam kerawang gayo ken ules
Ninget kite ken tari bines
Daerah asal gayo lues
Irwansyah Doank :
Entiwe kite muterem matuk
Denang itauk urum laing sibelangi
Ike mungarang enti lagu ilntah Mungerumuk,
Kona Bako Ari Tebuk Meh Kam Bala Bili…
Dele olok Ceh Mucikang Ponang.
Gerjen Berdenang Nge timul Seldi
Pora Itep Onem Matae Ilang
Gerene Tertasaken Bandang Urum Belanga Besi
Ibarat Batangni Menet
Musere Kubatangni Ungke
Abang ikenawat siberate Menet
Aku i Linge siberksul Ate…
Amalah :
Oya nge sawah serinen irwansyah
Si lencem bijak kata bertuah
Buge manfaat gune mupaedah
Bersyaer gayo sesire berakah
Ike bertengkeh aku gere surut
Bier mi geh uren munutupi kabut
Suntuk sara ingi siep ku samut
Salam bersemah silayak patut
Edy fikri
Wo serinenku…
Enti bang ne kite musier
Gelah sara baris mubenyer
Keber jerohe si tersier
Kena dele pemikiran nge guser
Kugenerasi besawah
Kati jeroh beperageh betetah
Langkah sentat trah i tatah
Buge edete mien megah
Aleckave;
Ceh tukul muluah peri
Sikuen kiri enti mulo usik
Luah ni kekata lagu si berani di
Enti sapihi kati enti kona besik
Dep munangkok kami goyang kaki
Ke makin mungilih sire kedik kedik
Situkang tengkeh meh nuruhen diri
Si tukang baca nge meh kedik
Irwansyah :
Gere Surut Tapak karna simirah mata,
Reb enti mungoa so Lemu Benggali,
Timulni laing Kengon nge Ku Arita,
Wali urum Ama Nge muturun Seni.
Ku Amalah Ari Kenawat Aku ngune pora,
inih mate mata ke sitimul ini
Kengon nge Mubeltek Laing kureronga.
Enti kire sipu mata Entapni Peteri….he he he…
Amalah :
Bier jeroh inih si mumata
Gere mera mate ike cocok pupuk
Gere silo aku kin puteri reronga
Bier mampate lagu rom tajuk
Ara ilen mu ikot setali benang
Punce urum ralik mantong ilen tegang
Kune die nge seni keber i kampung tunyang
Uah ni durin mantong ke ilen mubunge ilang
Aleckave:
Emus nikuyu ari kenawat
Jening ni lempusing i reronga
Si betengkehni pelin kelas berat
Tikik salahe sudah tua tua..
Hahahaha
Batang ni durin i kampung tunyang
Uahe ruluh i timanggajah
Buet kelemni lagu gere imbang
Pelanuk ilet mulewen gajah
Irwansyah:
Muhahoi si mubaca
Berjalu kekata kite kelamni
Kerna Lewenku nume Sara roa
Boh gelah kupangka so urum ini…
Gere nguk sakenak Mubaca Kiteb
Ike reb-ereb bene ko makna
Berseni lagu jema mutorob
Nge pedokop itik wan Paya….hahaha
Nge gaeh mien situkang jalu
Ibarat nonton tinju Muhammad Ali
Abangg Jun Anri sinemah minyak Lampu,
Inget Meh Dagu kahe gere tene Ibi….hihihi
Amalah:
Simubaca kedik mu gagak
Munengon si bertengkeh kedik muserlak
Bier ari kuen kiri gaeh munimak
Bier kona tetal aku gere ulak
Enti olok tu tetal ike i pangka
Bier pe kona enti sampe luke
Laing bersorah nguk pora pora
Anggap ini kin cara bersene
Aleckave:
Lagu muberet lewen kelamni
Ceh tukang jangki ari kampung tunyang
Gati kite erah i kute sigli
Munemah mangki narangen jelbang
Hahahaha
Tabi Urangku…
Irwansyah:
Aleckave Pengulu Bersah…Ling isesorah
Lagusi ikekuah Durin wan panci
Ike gere lungipe Durin Timang Gajah
Amerawe turah Jema simubeli
Ike Lemakpe Keramil ari Bersah
Apak wan awah Lagu sedepen Sugi…hihihi…
Ecek Suku
Mukale ni Amalah Ari Kenawat kite konol semile
ejet sipinte kite morom mukamul
Bersiturin kite sesabe kite
Tene sara sarak kite bebewente.
Len samut mupinah cerite
Sene berakah enti kin dewe
Ggelah sara langkah orom sara cerite
kati sawah kite ku duduk nitenge kebeta ya tgk Jus Anri.
Jus Anri :
Banjir ni langsat ari kute cekal
Ike nengon akal bewene kami salut
Oros belangi ari ume dewal
Gerjen mari nge mulei surut
Aleckave
Durin i tunyang nge faham kami
Kaulen ku uah tapi gere lungi
Keramil ari bersah sabe i gunei
Pelemak ni kuah dum sikukuri
Irwansyah:
Bg Jus Anri nge langkah sentat.
Minter kulangsat Beluhni Peri.
Betul abangni Ceh Kurang sehat
Ku kunei pokat ijewebpe Kemili…..hihihi…Gereke Empun Badro ..hohoho.
Abg Ecek Suku…”,Kelamni edisi Didong Jalu
Lewen sademu gere pakek giging
Ike mayo kumah turah itetok pintu.
Enti renye uku naru muneramen rering….hehehe
Amalah :
Ike i kaji keramil lemak
Santan sibijak kin lemak lungi
Nengon ku syaer ni sentan ku simak
Ara si osop mununin diri
Enti buge surut kao Jus Anri
Siepen pulpen buku terkiri
Bier laing bersorah surut ko enti
Gelah jeroh i petetah jeweb si pasti
He he he he
Alecka:
Bg Ecek Suku gelah kin wasit
Iyupen serumpit ike cerak kemali
Lewen kelemni pelin tukang serit
Tulak sengkelit gere mari mari
Hamdani Toa;
Bang Irwansah tikik peri ku tutur..
.kati bangg teratur ike umpama bata.
ike garu ni semen ledak musesempur.
ceh kerung simpur nge teridah murangke basa
Enti kite rie kase tekabur .
atur ni ukur jengkal urum seta.
ike olok tu kase pepok ni mungkur
Gelah iunur unur baca ni doa
Irwansyah
Ike inur inur oya basani tentung Kapur
Bepangir mungkur Asa urum waihni Paya
Kati iperin Putih ko kapur
Nguk icampur Urum mangas muwarna…
Munadok Semen kati enti musempur
Waihe iukur enti muceceda
Asa kati bebpe Jema bertempur
Numele lopah Dapur imah ken senjata….gereke beta
Abdul Wahab Daud
Mata nge sapur kulitpe kerut
Be beles kata gere kire surut
si tulisni mejen mubeda maksud
ujung ni jejari turah mu kukut
Ku tatangen pumu sepuluh jejari
Ku abang urum engi kutiro tabi
Berbeles peri wan.dunie mayani
Mera kahe tuturte salah peri
Aleckave
Kena waktu pe nge gelep nyata
Nge osop si bertengkeh ni keta sara sara
Maklum kite lang turah berusaha
Gelah istirahat mi tubuh i dora
Selapis aku muniro tabi
Kedang ara cerak si geri berperi
Gelah wan ate enti ber pari
Kin luke ni ate berpari wan usi
Amalah:
Berizin ku salam semah
Ku serinen ku Irwansyah Doank si munamah runcang syaer berdenang
Beta ku rakanku Aleckave Pengulu Bersah
Si kelam ni salut aku munaos syaer bertingkah
Kin anak ku Jus Anri bermohon maaf ku tiro tabi
Kadang cerak si lepas gere terkale i
Enti kin penyakit berkemas wan usi
Beta keta ku serinen ku Ecek Suku
Bier sara sara tangkuh tengkeh mu
Sabe kami senang berjamut pumu
Buge arini ku arap mutetah tentu
Kin sara kata kite nguk bersatu
Brizin ku anak ku Hamdani Toa
Nge tangkuh laing sara patah kata
Buge isi ni syaer ni bermanfaat guna
Ku generasi mude si ara mubaca
Si paling utama senior ni kami.abang Abdul Wahab Daud si ku hormati
Si kin tunkelen ulu kemudi
Berizin ku ucepen kutatang 10 jejari
Ku sipedihe Arjunaidi AR
Tengkeh ni abang olok bermakna
Ku harap ilen berlanjut tengkeh ni
Kin memperkaya khasanah budaya
Kelam ni gere ara sawah tengkeh ni Tungel Belang
Beta keta urum rakan Sulaiman
Eddy Fikri pe kengon gere ara terang
Beta keta Bahtiar Gayo kusi die beluhe kabang
Gere ara tangkuh ling sara kucip
Ari rakan sebet Mursyid Aman Qarib
Kedang tengah sibuk munurus rakit
Kin perau wan masa kampanye aktip
Salam semah ……. Amalah Ari Kenawat
Irwansyah:
Si osop gelah berperah
Si Luah gelah kite kenali
Polokpe Berpenumpuwe Turah
Ate mubarah Gelah mujadi Bengi,..
Sejukni Kulkas simunaso Bengi,
Lagu igunung Fuji Lembabni Hawa
Kubiak Suderengku Bewene kutiro Tabi
Si Nge Mera Berseni Urum Bujang Teruna…
Ari kucakmi aku urum Abg Kabri Wali,
Kami imai Ko Toweren Antara
Iejer Ama Aris ken Generasi.
Mulanyutni seni urum Budaya.
Kutunyang iserahen Kin Buah Hati
in Anak sibelangi urum jantung Rasa
Kucak berkaul Itelege Caya Negeri
Oya si Rasmi Negeri ANTARA,
Kukampung Linge Abangku Gaehmi
Bersilaturrahmi wan Sara masa
Ukum Anak Angkat lagu anakni Kunci
Beluhe gere Pasti Ku uken Ku Toa
Teruna- Arita Gere terbelah Lagu jejari
Nge beta Bang Ari ilahi Ku Aku kona
Ngenal Induk semang kite wan muripni
Boh kati mujadi Sanahpe Rencana.
Kati perseh bang Peserinenku seni.
Irwansyah Doankni ari sihen keta
Entine Mulape Wan ate Sanubari
I Linge Penanti ikemukimen singah Mata
Nge Musorah Laing Kubujang Arita
Durin Reronga Si olok Lungi
Digul Timang Gajah Wah Mujana
Nge ibetih Jema Kupelosok Negeri…
Berjaunangmi Ku Jamat Keta
Durin Pudaha Masih Aseli
Berkekede imai Keluarga
Ara Adinda isone Penanti…
Bahtiar Gayo :
Kerna ben sawah kami ni langkah
Kutiro tabi maaf ku jurah
Kengon belangidi tengkeh berakah
Si tukang seni nge isapat amalah
Nge lagu tingkah atani panggung
Kunul mugelung dumet iluah
Muniro cecah so mana lusung
Si kerna jingki nge male punah
Kuerah tengkehni mujempuresen
Lagu tok legen geh ni bimeren
Sahan kin demu mehne kin lewen
Mera pitemen gere tehen beden
Ike belangkah sedien selpah
Kire enti sesanah ilah ni dene
Selo kin Arita ni kite itengkah
Mera murulah jin Paya Beke
Iatan kerlang simen ni pangkat
Enti kire jengkat kao mumanang
Kaulpe gajah igemet ti pacat
Daleh rum pedang murayoh ilang
Tungel Belang
Kelem ne nume aku gere sawah
Ari jarak we aku munerah
Ku era tengku pe nosah ceramah
Aku mu baca sire golah polah
Bisilo nge terang lao
Ara muterang ni aku kekire
Maklum murip jarak wan ranto
Kenake murum kite bersebuge
Gere pas i perin pane bertengkeh
Teku belejer munulis kekata
Gere mepat kata urum gere ilen paseh
Niet wan ate asal enti lupen kin basa
Sulaiman : bukan tengkeh balasan dalam syair ini. Tetapi diambil dari syair Sulaiman.
Gere terasa puterni waktu
Sebeb lagusi mudedi ilen perasanku
Ari untilku pedih iosahe kuaku
Rupe nge ara roa ni nongni kumpu
Asal ike tutur male kite surah
Gere daleh iukur urum jangutni dagu
Bier sejengkal nge mugeme teridah
Gere renyel turah datu i talu
Betawe mien ku kamipe kisah
Asal perumuren gere ilen narutu
Buah hatipe si sara ilen kedah
Se nge irasi turah urum awan encu
Gelah sehat sehat ku doanen turah
Buge si nge iosaheni kase mutentu
Ku ama ine si nge iosahe amanah
Ipapah renyel tuah kati niet awalmu mutuju
Ananmu siopatni urum awanmu si lime
Keta anan pedihmu oya si sulubere
Senang wanateni kami asal gerene pure
Gaehmu mulo kin jamu se nge kami terime
Mursyid Aman Qarib: (diambil dari tengkeh sebelumnya).
Lewat bur lintang male ku linge
Deledi relas wih mujengkele
Kuputer arah lewat lut tawar renye ku serule
Lagu len di gerdak ni tuke
Ulakke ku cube singah ku atu belah
Lompong ganir gere ne teridah
Oya kati bese nge edet meh mubah
Gere ne muninget kin ine i umah
Asal linge awal serule
Sepakni ni nge meh penge denie
Jamur gogop supu serule
Sana kati buetni gere munge-munge
Lagu jep tun dor kona cogah
cerak sempoloni nume berakah
Sana si ceraken gere ne ipapah
Oya kati benne gere ne sara langkah
Arjunaidi : Bukan balasan dalam tengkeh ini tetapi diambil dari karya Arjunaidi.
Mari lues belang musim berume
So gelime kin jengo mujelbang
Atan pematang kejurun menene
Kona waih nume sampe mugenang
Tauk mulawi beberu sedang
Muloi munomang ilah ni ume
Atan patal bebujang bedenang
Si karna bedang nge siep sedie
Mulamut wan raom male dere
Nge ara tene male mukemang
Sene galak kin penggure
Masa sedenge buet nge lapang
Munuling asal wan kemaro
Gere mutoho kipas ni bulang
Reden itatang lagu emas berpuro
Manuk gerico atas lao timang
munyemur raom wan lao parak
Ate pe galak kekire senang
I giling asal urum mesin gerbak
Sudere biak gere murang_urang
(Red LG)
