Lo Sabtu mane, tanggal 22 Oktober 2011, kire-kire jem 19.30, terjadi musibah umah musiut i kampung Ie Masen, Ulee Kareng, Banda Aceh. Umah simusiut roa umah, reroanne urang Gayo empue.
Pertama umahni bang Zailani aman Lia (karyawan i Harian Serambi Indonesia); dan kedue umahni alm. Fauzi Abdullah (mantan Sekda Aceh Tengah). Kondisi ni umah reroanne meh gere teguneine bahan-bahan sitaring. Penyebeb ni rara karena korsleting listrik ari umahni pak alm. Fauzi, renye munyerempet ku umahni abang Zailani aman Lia.
Keber tentang musibahni renyel musier i Banda ni Mingu mane ari awah kuawah, renye imuat mien oleh Harian Serambi Indonesia edisi 23 Oktober 2011 halaman 3 (kepada redaksi lintas Gayo mohon gambar e itampilen).
Seni keluarga bang Zailani aman Lia munumpang taring i umahni adik ipar e, DR. Mohd. Din, SH., MH, dosen Fakultas Hukum Unsyiah, gere gip ari ton kejadin.
Hasil rapat Keluarga Negeri Antara siaran soboh Mingu serloni, isepakati renye bahwa kin Posko Tanggap Darurat i umahni Bang Mohd. Din ni renye, jadi ike ara ama/ine/sudere si tergerak atewe mubantu nguk renye muhubungi panitia i posko umahni Bang Mohd. Din. Alamat lengkapni Bang Din ni: Jalan Tgk. Dibaroh, Gampong Ie Masen, Ulee Kareng, Banda Aceh, nomor HP-we 081321027356 dan 085260753378..
Untuk rekening peduli musibahni tengah atan proses pembuatan, mungkin kase lang nge ara rekening KNA khusus kin tanggap peduli kin musibah si lagu nini. Jadi ike ara ama/ine/sudere si bermurah hati nguk kase langsung munayon bantuen ku rekening si male i tosni.
Kul harapen ni kami kin bantuen ni ari ama/ine/sudere bewene, kite buktinen bahwa pepatah ”alang tulung beret berbantu” atan muhadapi musibah si lagu nini. Serloni mungkin kona ku abang Zailani aman Lia den alm. Pak Fauzi, sa mumetehe len lo kite sikona musibah.
Besisawahn kite kusuderente bewene, bentuk bantuen gere mesti sen, arake oros, jantar, pakaian, atau alat ni umah nguk oyape; sebeb bewene kite perlu atan tanggap daruratni. Beta keta mulo keber ari Banda Aceh. Wassalam Marah Halim (Sekretatis II KNA).
