Oleh: Saifoeddin Kadir
Aradi kiteni,
gere jen bekumur nge murokok,
ari oné le udah géh ni atuk
gere jen tue dabuh mubongkok
ungi wan éyung nge kerlék kerlok
kak musengkak gere berlowah
gere tebetih ne bewu ni awah
nge ngar ngor sintak ni kesah
Aradi kiteni,
mumangan itunung seddep ni awah
besuwep gere ne munenérah
bubuh kero ku pingen cap kuwah
cap jantar powén céléten cecah
ulu petungkuk gere mingah mingah
sana si médang gere mupantang
begu karung ibus, makin i asak makin lulus
Aradi kiteni ibarat korik,
gere jen munaruh nge mungetok
gere bejenta suntuk temabur
kepék i kekepak uki i kekepur
tatangan ulu i narun rongok
mejen i kekerut bangun si megah
Aradi kiteni
Gerejen mipon nge mungét
gerejen musawit kenak munyigit
gere tar usi keta tar kekulit
gere demu dengké tulenpé jadi
ari oné udah ralik ni sipet ilet,
gere der meradi sara ketike mupelet
Aradi kiteni,
gere jen bebasuh nge besuep
mulon mungutep puren bismillah
ku penan seddep gere ne berélah
gere ne bekésék gere ne betapi, beta kedah
oros wan niyu mugelice kelumit urum belatah
Segger reral benar urum salah
seger dolot usi urum kuwah
Aradi kiteni,
lagu ling ni jema tetue
nge munge umah meling pepalu
nge munge kenduri i talu tengku
tah belem lagu si gere beriro
ari jarak-jarak i sesino
sediken sesanah gere ku aku
Aradi kiteni, mejen.
kédah ke tengah nyanya
ngenaken tulung ari jema
pora padeh kédah musalit
suntuk sabi wan inget
cit nalah
aradi cecerak jema
enti kite lagu noya,
lagu lemu tangkuh ari wan paya
munemoh mumutir betiken
gere jadi milit tulung ni jema gere ne ninget
Aradi téngkéh ni anante pudahna,
kin lelon orop i cecerak. I kekutep kadang kasé lemak
benar salahé urum-urum isimak.
Iwan kelah enti aran terbong. Iwan tutup enti aran sompong
iwan jumpun enti ara mupulo. Iwan aré enti ara mukilo
kenge itebbes entiné ara mutungul,
enti ara muberus kenge ikepur
iwan buntul enti aran jumpun, iwan tumpuk enti aran tamun
iwan seladang enti aran binuhen, i wan batang ruang enti aran umah-umahen
Aradi manat ni Muyang Datu,
peri sara patah ling mutentu
kin tikon tekala remalan, kin tudung sediken uren
cube keta i pengénen
kediken ara sesara buet
ike si mulo enti ipurenen
ike siberat enti ipereringen
beta atur kati enti muligen
si patut i duru enti bubun ku uken
oya le manat kite gelah inget
gere mehaten entah lang entah suwi
takdir ari tuhen male kin rejeki
ike kin tengku enti taring suret
ike kin reje enti taring edet
ike kin utus enti taring sipet
a udah kite gere ne pipet
penoren gere belle, nge mununung ewet
Baleatu, Takengen , 07 Oktober 1983
