[Sastra Gayo] Mujege Peri Urum Basa

Oleh: Radensyah*
Uwo… Sudere …
Ku beningen.. Ku ceraken.. Ini mana pora…
Ku bebewente rata…

Berucep jeroh bertutur laing,
si olok penting oya nge terang,
berperi manis sunguh disinting,
gelah isaring cerak ku si lempang

Enti bojor-bojor muluah cerak,
oya gere layak jema munimang,
urum si menge kite mera rusak,
mubotom salak ate gere senang

Gelah bepikir muluah peri,
mien belangi ike mupetimang,
laeng si sakit enti peralai,
enti mu peliti alas sibedenang

Dele ari cerak gaehni bele,
dele sudere mutamah rengang,
perempat ni basa sigere bergune,
ahere sudere nge emeh musirang

Sipet munupet enti kite kona,
oya kumara agama mularang,
si ceraken gere sareh nyata,
kite berdosa neraka mubayang

I sara  ketike imem berperi
imem Al-ghazali mungune terang,
sana si tejem idenieni,
muritpe berperi iperine pedang

Si olok tejem delah ni heme,
rupenpe nume tejemni pedang,
awah becerak ara-ara seje,
perasan manusie sakit munimang

Haep ni diri enti i seseder,
kecop berpeger enti mukemang,
hamakni jemape enti iunger,
keber musier entine berulang

Berperi manis betimah lemut,
oya munurut edet terpampang,
becerak layak, bebasa patut,
mupayu turut tutur berarang

Sengkiren ara laing mulepis,
enti renye mulawis jiwe muguncang,
enti renye teles salakte bengis,
gelah itangkis peri simulantang

Becerak pantas i pikiri sunguh,
basa si tangkuh gere ne terulang,
awah mugemot laingte beluh,
maknae boh eruh cap itimang

Ketike demu urum rakan sudere,
enti dor bekekede lawi muguncang,
boh gelah mu gune cerak perinte,
itaos cerite manfaat te terang

Mukale di kite kin basante jemen,
mampat petotoren enge terpancang,
bebasa jeroh ber si belesen,
ara ipergunen masa datu munyang

Besilo mengoh si gere terketep,
nge osop sedep basa i timang,
cerak silemut gere ne tegep,
basa emeh silep, peri emeh sumang

Beta mulo kedah kurike laing,
terbilang penting cerak simurentang
kemuduk nari oya bewente pebening,
basa bersaring atente senang

*Mahasiswa Semester VI Jurusan Tarbiyah Prodi Bahasa Inggris STAIN Gajah Putih Takengon. Beralamat di depan gerbang tugu Radio Rimba Raya, Kecamatan Pintu Rime Gayo, Bener Meriah. Email: indigondg655[at]gmail.com