by

[Sastra Gayo] Nge Adzan Pake

 

Oleh Radensyah*

Masjid

Corong urum emik, mugerosok laing,
agak mu luting mu emus pora,
mengoh mutures ku kemiring,
adzan nge meling mu nalu jema

Mumerin lafadz ku bilal tentue,
kite si mumenge berbeles do’a,
bertutur nabinte iwan hadist se,
nge mari ipenge ara si baca

Adzan mentalu si enge mepat,
waktu sholat teneye nge ara,
kumasjid kedang gere sempat,
ketane sholat boh urum keluarga

Adzan mentalu sawah lungun ne,
mugerak ni ate isimaken keta,
ike siterih mu uwes atewe,
renyel ahire wudhu berdoa

Si enge gerle tir naringen buet,
pora mupipet isihen semala,
telkung taring kerna gere inget,
tir tersiet begegantin deh keta

I sara ton lagu gere mujinger,
gehpe keber a lagu biasa,
adzan mentalu kin tene keber,
heme tempier kuken-kutoa

Ara sara pen pora musingung,
teba termenung sagini jendela,
adzan ku qamat nge mudengung,
mukaledi telkung mudemui semala

Wan male maghrib bilal si sedih,
enge tekih lafazd ni kekata,
adzan silungun naru mu lanih,
ate si pulih jama’ah geh sesara

Ari masjid adzan kite penge,
iparin kenakne mulo buet siara,
nge mari sholat lanyut miene,
sikerna buetpe sintingdi utama

Tar male iyo lagu mu sige,
cap bekekede kekanak musangka,sholat maghrib sawah shaf tige,
boh buge-buge dor lagu noya

Laing ni adzan osop-osop bene,
kampung mumenge lagu gere kona,
panitia masjid pora ibening ne,
tair itamahne coronge nge roa

Mejen kiteni wan perjelenen,
male kutakengen ari rime raya,
tengah adzan ikampung lampahen,
honda itedohen sholat mulo keta

Adzan shubuh lafadz se mutamah,
oya ngeturah mungandung makna,
kati enti ne nome jema iumah,
sholat itetah mudemu pahala

gere arake sedih kite musipu,
bilal mentalu kubewene rata,
sinting disayang adzan jep waktu,
gere hek munalu rata kujema

*Mahasiswa prodi bahasa Inggris STAIN Gajah Putih Takengon (indigondg655[at]gmail.com)

Comment

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.