Oleh Hasanuddin Aman Wahyuni*
Assalamu’alaikum wa rahmatullahi wa barakatuh,
Pemulo pedih bersyukur kite ku Allah, berselawat kite ku junjungente Nabi besar Muhammad SAW, Ama Reje simusuket sipet,,Petue simusidik sasat, Imem simu perlu sunet,rakyat genap mupakat. Terbilangen si jeroh tar ketike si bise ni,nge le sawah kami koan batang ruangni si mutete gergel.
Ama Reje guru ni kami, Kami sigehni tose ara opat lime jema, pertama pedih selapis munentong ari reje, kemuduk ni oya tose ara tikik ejet niet angan kasad, gelah bang kusawahen tikikmi kati muperseh terang kami sigehni ari si opat.
Ama Reje guru ni kami, Ejet niet angan kasad ari muloe berakah male kentuah kemana male bunge bang mujadi uwah,oya empue simumetihe, enta kune oyape turah kite syukuri urum-urum.
Ama Reje guru ni kami, Buetni Tose gere nguk gantung tung patah titi,buetni siara ni jema, dele ni pake nge turun temurun nge tane temane ari pudahami.
Ama Reje guru ni kami, begi peri sine gelep ngenaken terang, kuyu keras turah berpenampong, edet berujud, piil berupe, semi bertubuh.langkahni singuk iperinen,ike kite ulaken ku edete, beramat amaten kite kusi nge munge kene sitetuente Turun Caram berjule emas. ken edet sikatan unyuk kata olehte.
Ama Reje guru ni kami, gelah kami tenumpitmi bang ketenumpiten si king, si katan kuninge nge le bertimang, ke siperin putihe pe nge keta berbilang.
Ama Reje guru ni kami, ojote baru mera berubah, mungkin mera mupinah, mata ni pe mera musapur terang bagi kite heme, mera we mutaluk iden,mera we mulupen lala.
Ama Reje guru ni kami, enta kune kenge melengkan lagu simurum kite, ike siselput lepas inarun, ke sikonot keta kite jengkali,ke sinaru nguk kite setai, ike sikul kase nguk kite dokopi. Ama Reje guru ni kami, ini mana Nahma ujute ,kami nah han keta ku ari ama reje isien gelah bang selese ikekesi rejengku pedih.
Genap erep ini padehe singuk kusawahen labih urum kurang kutiro ijin “Ari Bale Atu langkah mutentu,niet munentong sudere ku Kelitu,bierpe lut tawar mugelumang pitu,turah urum luge we kayuhni perau, kedang ara cerak musembilu, kutatangen sepuluh jejari ni pumu, buge enti ara rusak rasi ate lembayu”
Wabillahi Taufik Wal Hidayah
Assalamu’alaikum wa rahmatullahi wa barakatuh
Nara Sumber : Syarifuddin Hamid, SKM, kelahiran Serule,1 Juli 1958 Pustu Pante Menye Kuala II Bintang Kecamatan Bintang
—-
*Urang Gayo tinggal di Banda Aceh
