Suatu sore di kota Malang, ayahanda Saifoeddin Kadir “berkekeberen” kepada cucu “ulubere” nya tentang tradisi bercocok tanam padi di Gayo. Kekeberen itu saya rekam, saya tulis dan saya dokumentasikan. Ada beberapa kosakata yang asing ditelinga, sehingga saya harus meminta penjelasan kepada bapak tentang arti dan maknanya.
Menyongsong diselenggarakan lomba Resam Berume di Takengon seperti diwartakan media Online Lintas Gayo, 15 Mei 2012, kehadiran kekeberen ini mudah mudahan bisa memberi sedikit makna.
—
PUDAHA urang Gayo sidelen ne berume. Ume e lelues. Dele inih nume e. Jejarang we berempus. Ike arape bis-bis kin pangan. Lede tikik, kacang tikik orop genap kin jantar diri. Iosah osahi seba ku sedere. Gere ara bejuel lagu besilo ni.
Ume nguk perin kin batang. Lues ume dele rom ikemasan wan keben, beranang pe engkip, kekirepe temas, temetap gere ne rusu. Ke sanahpe male ibeli keta oros ijuel. Kin regge ni baju reraya, regge ni dengke megang, regge ni manisen keramil lepat reraya, belenye pasa, belenye berume. Nguk perin baringsana buet, oros we pangkale. Gulemasen sara pe beli urum oros, tuker. Patut kati ara ling ni sitetue : “Tungket imen beras padi, tepat laki kerna perempun, tepat perempun kerna makanan”.
Sinte morip sinte mate benne urum oros. Tekala mungerje, berkekunce jema berperasil munutu rom ku roda. Sebeb mungerje gere genap serlo roa lo, lagu besilo ni. Ari mulo ni buetmi, suntuk sabi murum bepakat. Musapat sabe sara ine, sabe sedere sukut si besinte. Jep murum jep mangan. Bepakat menerime penginten(menerime belo), bepakat munelah unyuk, teniron, munongkoh bilangan sijeroh ketike si bise terlo sana buet pengerjenna kase. Jege use, jege koul, pakat sudere, benne urum pakat. Jep murum jep mangan, oya simehatte.
Oya, beta kedah baru murum sabe diri, sukut. Gere ilen dele tu jema e. Ara pepien olang ilen si tetue-e mepat-mepat, si muraminne ke kekanak. Ata nge beta urang kite Gayo ni, nume tetine ama ine-e pelin we si geh kase ku pengerjenna, anak ilange pe urum, seulah-ulah nge minah umah. Ke makin terlo mah beyi, jema delepe simehate nge i angon, keturah dele oros meh. Dele regem ni buatta, kamul sudere, jege use, jege koul, mah beyi, mah kero, munenes, semah, macam ilen. Nguk perin oya bewenne bepangkal ku oros. A kati urang Gayo sunguh pedi berume. Kemel ke gere mume lues.
Beluh munebuk, munebang, i perah isi kin ara tanoh si nguk irukah kin ume. I tos tamak, i pitet arul, i sengkak kati wih mugenang. I tetah rerak kin dene ni wih male i mah kutanoh si male irukah.
Ume si nge mokot iumen kedahe lagu ume tenaring ni datu atawa awan te, geralle Ume Sele, lewenne ketta Ume Rukah. Ume Sele le pemuette. Mera le ike senalih inih, rai-e roa tulu kunce. Ike ume rukah gere ilen beta. Sebeb kadang te gemur tu tanoh, romme Songong, nge turah uling ulung. Atawa weihe kurang, rerak murelas, manuk mumangan, pangan tetangis ulunge, seba ara ko batang, tikus mungunah, babi mujongkor, macam-macam.
Gelah kusedder keta pora kune jema berume i Gayo so jemen, si kinget-ingete, wan umur ku beta kedah.
Musim berume turah ipengen ling ni Kejurun Belang. We mu nos peraturen. Peraturenna turah ipatehi. We pane, we aris, we mumetihi bilangan ni ulen. Betihe musim. Ter ulen sana geh uren, selo nguk munyouk, mujergut, munomang, turah Kejurun Belang kin tunungen. Ike sengkiren ara simunungkahie, meradi mu bele. Rom gere mujadi, tikus mumangan, tetangis mumangani ulung, macam macam. Tumpit, Beret, Mirek, manuk pe renyel dele geh mumangan. Ara ilmu e ni Kejurun Belang a osah Tuhen. Nume asa we mujaminne, cume hakikette so beta kedah, ke murum-murum kubaring sana buet delle hikmahe. Oya kati ara pepatah; Beluh sara loloten, mowen sara tamunen, bulet lagu umut tirus lagu gelas. Gere jeroh musesolang.
Pemulo ni buet keta jema murerak, kati kering tempeh. Kati durus weih gere ara si mugenang, musuri. Mumantik penyemen ketta buet ni sibebujang, betersik kuwanni uten murum-murum. Tejem ni tersikka pe ngesawah mampatte. Tersikka turah kayu uten, kemel kite ike kayu leput, lagu selupik, kuel, medang, oya nge kin ololen kite, kenyel. Kayu musok lagu rembele, deddep. Turah kayu mersik, lesuh, gere mugegedok, gere mucecabang. Kayu anak, bulus. Ike nge musim betersik, murip musim ni jema begasing kekanak wan kampung. Sesire betersik imah aging, kayu sijeroh tos kin gasing. Asam, gelime, beberas, oyape ara tos jema kin gasing. Keta gasing oya, aginge aging asam, aging gelime dan sebagoi.
Murenem seme keta buet ni jema banan. Si jeroh e inih bereden. I pilihi tangke ni rom ari batang e wan tempeh so sibelangi-belangie, oya ipesiep kin inih. Nge ara dowa sempena ari Kejurun Belang baro kite nguk munyouk. Dang-dang munantin seme, jema pe dabuh Mumelah. Pudaha jarang-jarang ilen be nengel. Koro bubun jema kin penengel, nume kude. Mata ni nengel pe temor, nume besi. Ke nge musim mumelah nge rami jema wan lah nume, bejamu mujelbang. Ini tuges ni bebujang. Bebujanga kin jamu, a kati nyanya kite tekala oya ke gerara manak bujang. Jarang jarang we jema simujelbang ume-e kin dediri, suket gere manak bujang, atawa gemade pedi gere mupangkal. Biasae bebujangni bebujang belah diri, anconge beta kedah pemili ari belah len so. Osan kase pemango ku ulu ni serami, geh renye kase benne. Oya kewajiben ni bebujang, rum galak nate we. I tossen jengo e berah rum, i gelihen korik kin pong kero e. Betta resam ni bebujang murum-murum kubaring sana buet, bersitempuhen.
Munerlis, mumatal, mumerjak, mumantik seladang, muminoh, mujik a bagin ni bebujang. Sawah ku mununyak seme tekala munomang pe si bebujang. Ke makin tah aman mayakan, ketta we le sipegosok.
Buet ni jema banan ketta ke si beberu Munomang, Mulamut, Munoling, Munoyoh. Oyape murum-murum. Mujergut seme ketta tetuwe banan. Munangin pe betta, si gatinne tetue banan. Kati berkat.
Si gure tekala mujik. Wan buet ini nguk perin murum bewenne, tue mude, kul kucak rawan banan bujang beru. Selapis nguk perin buet bergegure. I angon biak biak, i angon ralik, i angon juelen, itosen penan, berah rum, kunyit kin jengo. Igelihen korik, ipengaten depik, gere ke keta, kadang gere ara mu depik beluh mulo begule ku wih kul so, munyangkul, mudoran atawa munyekot.
Tetue rawan keta sesire lemongoh atan seladang, buette munouh muluahi raden. Mubenyer kase roa roa, tulu-tulu dak ku duru so. Tar arap pedih keta mugerbol, jemae keta tetue sedang si mersikke. Kuduk noya keta bebujang sedang, tar kuduk pedih si bebujang mutentu, si makal-makale, mulumet, alus buet te. Gere nguk taring sara rom pe ne i tangke ni roma. Lagu mudedaken, gere ne mubelatah, beta kedah.
Ketta kuduk ni si mulumet ni si beberu mujes. Kati muruncang pora buet ni beta kedah, beseje kase iangon beberu si mujes ni beberu ari belah len so, biak biak. Jadi sesire mulumet sesire mujes bersiturin. Tengkeh ari siye, tengkeh ari ini, unang unang besisu, kati enti penge sitetue. Kedahe ni sitetueape gere ne oloktu i matai-e, orop enti musayapan.
Surak pe mugonca,
was salu walee………. sak ku riye riye……..
ha hoooi, jempung pe mujempuresen
—
(Novarizqa Saifoeddin, Sawojajar, Malang 08/03/1993)
