Puisi “Denemku Kin Reraya”

Sofyan Griantara

Denemku Kin Reraya                                

Denemku kin reraya
Munilang rara songkoten peniru
Beberguk iwanni upuh kerung
Daring kuduk ku penite ni Awan Reje

Denemku kin reraya
Cecah kekulit berawas uwing
I sagi ni dapur lepat berdaring
Berebut budak,  muningok munampin lempuk

Denemku kin reraya
Semiang murum ku belang mungkur
Mujejak tapak wanni  lao eber-eber
Muniri sejuk ku waih telege bengi

Denemku kin reraya
Muninget kin Ine semayang i mata
Gere ne ara wih ni ragi si lungi
Gere ne kurasan jantar kurik bersengeral
Nge damai Ine i baur ni ume rukah
Kukirim do’a wan setiep lime waktu

Denemku kin reraya
Berupuh ayu gere lagu ni jema
I ukur kedeng urum kertan cike
Buge sepupu ukuren ni keletek sepatu

Denemku kin reraya
Manat ni Ine besiloni teku murasa
Iwani ranto mungenang jasa budimu
Munidesi untung kati lisik mubaca
Kusihenmi kusempam denem ni mata

Denemku kin reraya
Gagah ni Ama munemeng gule iken
Murum semile kenduri sara kuren
Dedekni pengat musap-sap ari belanga

Denemku kin reraya
Berules macam jing nome i mersah
Ber cok ayat tadarus i denang
Muguel tamur tekorek kin perungu
Rakan sebet sunguh gure e

Denemku kin reraya
I karang ni ampun muguel meriem bambu
Uluh regen i ango ku utem besiku
Ber arang kerlang sara batang opat pake
Ber tetungkah guel urum kekanak kampung baru
I pasang berok kedahne kin peluru

Denemku kin reraya
Ulak ari ranto murum sara berine
Mehni lo pasa lagu si gere ternampen
Asa beta nge sureten ni murip
Mumerah nafkah ku negeri ni jema

Denemku kin reraya
Ber ate galak i penujung ni pasa
Kertas cuti lagu si gere tuho puji
Langkah ini kusemahi uku ni Ama
Langkah ini kuziarahi makam ni Ine
Langkah ini ku singahi abang engi
Langkah ini ku mat jari bewene sudere

Banda Aceh, 13 Agustus 2012

Sofyan Griantara : Kelahiran Takengon, aktif dalam sejumlah organisasi sosial kemasyarakatan di Banda Aceh

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.