Eméh Ni Umur (Sastra Gayo)

Oleh:Radensyah*
Sudere bewene pengen kurike,
rata kuheme Bewene kona,
tekek ibenengen iwan kekire
aher morepte i wan agama

Morep idenie kite tamselen,
munonong jelen  Tujunte ara,
tareng i denie oya persingahen,
kuhakiket puren akherat nyata

Ku insen morep tamsel mu tuju,
enti murasa behu morep wan donya,
kite morepni dang-dang i talu,
bersiep menuju ku alam baqa

gere mubeza kaol rom kucak,
bier kekanak situepe beta,
malaikat izrail gerene jarak,
nyawante ulak engesawah masa

gere terbetih Emeh ni umur
Gere nguk iukur pekara oya,
tumung masae gere iunur-unur,
jeroh beratur kutiep nyawa

Beloh nyawante munarengen rembege,
ara sibise teba gere murasa,
ara sebagien tengah becerite,
gere mepat tene ari si sara

Seumpama geldok i lelah ni jelen,
langkah isirungen kusijeroh pora,
tape ke maut gere pat elaken,
si enge igaresen kutiep jema

Sara ketike ulama berperi,
ngeterang pasti hadist se ara,
belohni nyawa sedih penadi,
ibarat rui wan tubuh anggota

Rui mucabang iwan rembege,
iwas ni tuke mupacak rata,
rui itegu besintak gerle,
sinting dibise luer biasa

mutumpu ku amal sakit rom biseye,
jeroh amal le gere sengsara,
malaikat maut gere sampe ate,
ike hedepiye si gere berdosa

Ken emeh ni umur turah terbayang,
si jelas terang kutiep jema,
sediken terih loh te remenang,.
Oyale lambang ilmunte ara

Emehni umur tekek ken teneye,
si benare engok kite rasa,
item ni waok nge sawah potehe,
beta basae singket ni kata

Sedehni rembege taring petentang,
nyawante lekang gere iduga,
simen amal jeroh berate senang,
ike sikurang keta nge ku mara

Mutamah ni umur kekite beningen,
oya kerugien masa ku masa,
cumen ke iemah tar arah kuen, umur siberjelen nge turah mupahala

Ku bewene heme songoh disenteng,
nge tures penting pekara nyawa,
tumung  ni umur denie pe taring,
ku kubur beriring tempat si rata

Ku kite bewene simaseh sige,
berdoa kite kumaha kuasa,
itingketen imen entine rede,
beluhni nyawante gere sengsara

*Mahasiswa Bahasa Inggris semester V STAIN Gajah Putih Takengon, tinggal di Pintu Rime Gayo, Bener Meriah.