Oleh: Radensyah
Pemulo salam ku rata sudere,
ini ku luah tikik ku kite,
pekara hubungen pergaulente,
gelah bugep-buge manfa’ate ara
Ku mulón peri kukite muripni,
segele bewene gere lepas kendiri,
nguk i perin lagu mu naos kupi,
baro mujadi gule bubuke kona
Sesereng musilu oya gere sepeden,
turah murum kite bersibantunen,
mera murum iwani pergaulen,
ari beret ku ringen temas pekara
Musier tamsil lagu sara kampung,
bepakat jeroh murum bertunung,
behu berdedele buetpe tumung,
buet betulung bebewene murasa
Bermasyarakat kite bersatu,
besmusyawarah muturut payu,
bepakat jeroh bewenete maju,
si kin ulu munator cara
Sesabe insen kite berpaong,
ara buet bergotong royong
bewene sunguh enti muderong,
sara mu dong keta bewene beta
Besisalahen oya gere eruh,
enti berdedele munaos kiruh,
imah ku jeroh pikiri sunguh,
sediken kiruh tercemar nahma
Murum mi kite ku ibadah,
buet shalat kenake berjamaah,
gelah i ramin gaeh ku mersah,
pahala mutamah kene ulama
Belejer murum kite tingketen,
si mumetih keta gelah isawahen,
si mumenge keta boh ipengenen,
kerna pendidiken oyape utama
Sara kampung bewene sudere,
renye mu bantu ke ara sinte,
mukamul bewene tue orom mude
sinting di gure lagu keluarga
Sengkiren salah keta bertegah,
si terang benar keta berpapah,
oyale peri beta mulo pepatah,
cerak amanah masa pudahna
Ara sitetah gelah kite jurun,
sijeroh-jeroh renye kite majun,
kati temas kite sara jumpun,
murum mubangun bewente rata
Asa nge beta iwan masyarakat,
itaos tertib rata mupakat,
mutures peden gere se sengkerat,
enge sepakat gere ne céda
Ari ini ku arap kite bewene,
boh entine ara mucere bere,
murum kite tamah gere lale,
jeroh akheré kite tiro do’a
Radensyah, Mahasiswa Semester VI Jurusan Tarbiyah Prodi Bahasa Inggris STAIN Gajah Putih Takengon. Beralamat di depan gerbang tugu Radio Rimba Raya, Kecamatan Pintu Rime Gayo, Bener Meriah. Email: indigondg655[at]gmail.com
