Oleh: Radensyah*
Terucep Salam orom sengeje,
ku bebewente lemut tertuju,
si perin ate tikik ku uke,
syair kurike peri mutentu
Pekara ate si mepat penting,
beta laing peri ni ulama,
ate mujege ulu sawah ku kiding,
tukang saring tubuh anggota,
Rupenpe ate si juru kunci,
si munator peri lagi orom basa,
ike nge bengis jema emosi,
gere mupungsi ate ni jemawa
Penyakit i ate bermacam bage,
asal ku rere mu nemah unang,
ke gere ijege orom pane-pane,
rugi ahire gere ku lempang
Si nguk iperin panyakit iri,
ini pe ngeri ike nge ara,
pora mu lebih uahni kupi,
renyel kusagi ibotomen mata
Pele’oh dengki oyape beta,
sareh bahaya mien genancing,
nge ara kase jema mu honda,
labang i tama idene beriring
Cemburupe beta ike kite erah,
atente susah ike lebih ni jema,
penyakit ini enti sampe singah,
kite dor gunah gere ber jenta
Sombong ni diri oyape mayo,
lagu sok jago sipaling behu,
gere arih-arih si enge coco,
wan laho gerene nungkuk ni ulu
Ara sarami si begerel rie,
dele cerite sigere mu ujung,
sawah hakiket mulengem pe gere,
kune nye diye dabuh termenung
Iwas ni Ate ara si perin niet,
male berbuet wae si utama,
jeroh orom gere si petimang beret,
ate berhejet itunung anggota
Lagu sholat i umpama nen,
awah i gemoten baca niet te,
ara roa turah ibedanen,
lafazd si ceraken, niet si wani ate
ara mien si sunguh tentu,
jeroh mutumpu i ate berpari,
perasa’en nguk perin italu,
enti keliru boh gelah ijegei,
enti sampe luke perasan ni insen,
wan pergaulen mien keluarga,
segele bewene turah ibeningen,
boh kite pergunen ate urum cara
“salam pendidiken gayo!”
(Si Enge Mumetih Munejer, Si Gere Ilen Mumetih Entah Kite Belejer)
*mahasiswa semester VI Jurusan Tarbiyah Prodi Bahasa Inggris STAIN Gajah Putih Takengon
