by

[Sastra Gayo] Geride Ni Kenunulen

Oleh: Radensyah*
Mudenget kiding ni kersi opat sagi
si besilose tareng tulu, si renye
murerempong ikatahi bebur…

Wo kenunulen tue.. Kayu tegep,
ngemulepis bajimu.. Si gere ne
timang.. Murungkem mengoh male murungkem surang saring..

Alas Kertan taso belangi…
Alas Bedenang mukecop lengkung,
mhmhm.. Batang Ruang  kenunulen,

uyet ni senuen pubebedek musesilu,  sikil potongne mata e perempat ni
waeh libet lalu mujaril ku sirenah, uyet rege pusesino mejen ku dené
atu..

Lale ulung mumanang kintis pujejamah, mugerice munengol kero mutaoh
musempak.. Jamah ni kintis nge isi kenake, ione pakan ne

nge mokot tu kadehne peger pesesuk, mubungkuk nume bungkuk diri e, ari
serap ni peger sara senuen pebening terih kin bade si mempas, peger
kenyanyan menet lempang

mukale manuk.. Menet munengon lingang ni kerpe ibelang rata, si
murerebah kedah i seneyi kuyu.. Manuk mungiserni mata ari tamunen atu
kucak kucak.. Si renye renye porak.. Mhmhmh selo de uren..

Telege kul si muwaeh bengi tawar… nge mu ngeringen diri.. Berawang
berawang isagi marwahe osop pora-pora..

Mutetir tetikik karat ni besi ban geritan … Si begeneng berikot gere
serit pulih…

Ijo ni ulung kayu mutebel rerenye muitem.. Dul muterbang oya nge singah..

kalang memang gegiring, kurik-kurik kekemelen liwet iarapni jejunten
ni heme, kurik munitok bebasa “nume kemel kin bie” kené , samung ni
kurik sarami “basamu kin kemelku”…

Emistu kediye kalang munome, icabang ni kayu, si enge mupolok i
gerinem ni gegebe.. Kusi renye muterbange kalang si mu item oya..
Kalang geguk kediye si gere lepas terperin..

Mhmhm.. Jemenku..  Jemen pudaha..
Kenunulen si pudah ni lo ni opat kidinge tegep.. Dum kul ni rues se..
Serloni aku kunul lagu mugunah..
Sesukpe rere…

Mhmhmh.. Kenunulenku…..
(ike nume kite si besiloni munetah, ike gere kite mulon renye munetah,
boh arake nge len si munetah puren,isi nge? a mi, kemuduk nari oya ara
ike male i aranen ….buge bugeye boh arami kire, kite tiro Do’a)

Radensyah*Mahasiswa Semester VI Jurusan Tarbiyah Prodi Bahasa Inggris STAIN Gajah Putih Takengon. Beralamat di depan gerbang tugu Radio Rimba Raya, Kecamatan Pintu Rime Gayo, Bener Meriah. Email: indigondg655[at]gmail.com

Comments

comments