by

Lepat

Oleh Marah Halim*

Entapni bang Jamhuri becerak masalah megang orom lepat, ninget olok aku kin penan sisarani. Lagu singe iatan awah rasae woi, ke lagu ini merale roa are langkah ini. Terbayang tengaha jep megang ibu nos lepat. Kerna kami dele sara keluarga, lepata pe roa tulu are, dele di ge, sebeb ike senare roa lo nge selse ya. Nan pe waktu oya gere ara penan len jadi lepat lagut dor sidahpe i tos.

Waktu oya nos lepat hek pora kite. Oros pulute irenem mulo sara kelamen. Soboh kese nge lemut we. Ike ngelemut baro nguk itutu. Waktu oya gere ara ilen mesin tutu lagu seni, jadi tepunge itutu i jingki. Gere jep umah ara mujingki jadi turah lagu berebut carae. Kenak tir ke demu giliren keta tir wet soboh. Jadi eber-eber ilen lo kami nge i umahni jema si ara jingkia. Oyape sempat nge ara bekas tepungni jema, berarti jema lebih tir ilen. Kadang sebelum wet nome pe we nge i jingkia ge.

Jatahku (orom ara adik rawan sarami) mudegen uki ni jingkia, kene istilah seni i genjot. Turah pane carae oyape katinti sesak kiding orom batangni tetinyelnea. Ke jema gere penah ku jingki gere tebayangne kune carae. Tugas ni ibu I awah ni jingki mubebalik tepung katinti gunte. Jep mutatang tutu ni jingki a ibu nayon pumue ku luang atu ya sehinge ancurni tepunga rata.

Perlu waktu tulu atau opat jem baro selse munutu tepung. Sawah ku umah biasae tepung iparin kejep atanni niu lagu iangin-anginen pora. Cumen gere nguk mokot idaten sebeb mera macam tepunga, jadi turah siep-siep itetah.

Dang-dang tepung ikekuyun lagu sikuperinne, ibu mujerang gule aren atau gule ilang atanni cerek. Orom oyale tepung iramas. Turah ibengin mulo wihni gule ilang/aren a baro buh katan tepung. Muramas tepung tikik-tikik, gere nguk dele-dele karena gere jeroh hasile. Kire-kire ukuren tulu kecal pumu.

Muramas tepung biasae atan niu. Sebagien jema atanni talam, tape perasanku ge jerohen atanni niu kerna niuni agak kesat karena itos ari kulitni uluh. Juga kerna niuni ara bau khase jadi mutamah sedep rasani lepata. Muramasni biasae ikeroyok kerna kegere lemem pora, jadi tetikiken tir munge.

Dang-dang muramas tepung biasae ibu murayol ulung nawal. Gere jep ulung nawal nguk kin balutni lepat; ulung ni awal keken we sibelangi. Jep jema atan empuse pasti isuenne awal ini. Kegere biasae beluh jema kuatan uten atau arul karna ara juga murip we. Berulungni biasae tugasni bapak biasae, ibu tau siep.

Dang-dang muramas tepung ibu nyiepni tukeni lepat. Tukeni lepat keramil parut icampur orom wihni gule ilang atau gule aren atau gule putih. Ike gule ilang keta lepat ilang gerale, dan ike gule putih lepat putih keta gerale. Aku sendiri lebih galak atengku kin lepat putih.

Meh ulung irayol baro siep-siep num lepat. Kona ku num ni aku gere jago tu. Cara num lepat pake minyak makan. Gere nguk tikiktu minyake kerna waktu nge tasak lekat we waktu iuke. Tuke e pe gere nguk tikiktu sebeb gere sedep kase lepate. Si jago ibu orom kakak; penumku biasae kul-kul dan gere lemus. Mupepien kuuji lagu noya we hasile sawah kedik kase ibu orom kakak nengone.

Meh i tum lepat renye irebus pake kuren atau sangku. Waktu oya sangku pe gere jep jema ara jadi sidelenne pake kuren kul. Juga mujerange gere pake gas atau kompor, tapi pake utem (kayu bakar) kerna i rebe/empus dele utem belangi lagu batangni pete, batang kupi, dan len-len. Rasani lepatpe mulen ike ijerang pake utem, lebih sedep lepate.

Kenge tasak lepat itangkuhen kuatanni talam atau niune mien. Sawah bengi mulo baru iikot pake tali plastik ujunge, oya gerale irunten. Sara runten lepat lime kuen-kiri kire-kire semelah 10-15 lepat. Turah imbang jumlahe kati timang waktu igantung. Nuet lepatape turah imbang, wet sara kuen sara kiri sehinge tetap imbang runten-ya. Lepat igantung atasni dapur penjerangen kati kona asap dan kering we gere mulapuk. Selen oya katinti ipangan tikus atau manung. Ike ara bau asap atan kulitni lepat biasae manungpe gere geh.

Jep bebuke atau tekorik biasae ibu mununu lepat. Baue musap-sapen kase sehinge ike kite tengah pasa merale batal rap bebuke. Jadi nguken nti dekat-dekat ku dapur.

Oyale cerite jemen masa aku kekucak nos lepat orom ibu, seni ibu gere arane kerna we nge mulo, tapi bayangen kune we nejer kami nos lepat mulintes atanni pikiren, apalagi male megangni. Kurasa bewente si lahir tun-tun 60-en, 70-en, atau 80-en aralen murasanni kune nos lepat. Ike si lahir tun-tun 90-en kuatas sok atengku gere demu ne pengalamen ini. Seni bewene orom mesin, kenguk kadang munum lepatpe urum mesin. Berijin sudere simubacae buge ninget ku sedenge.

*Sirejen kin lepat

Comments

comments