Oleh : Muhammad Zhahri Arigayo
Kurasanen kuyu sejuk kelem ne sawah ku jantung rasa. Kuyu urum luding pe besene mutamah ni bengi, aku pe Remalan ulak taraweh ari masjid Bengi mutamah sedih ni ate. Kerna tun sine pas ulen pasa ke nge ulak taraweh nge pasti urum ine remalan ulak ku umah cumen tun ni ine tengah gere sehat urum beden si maken lemah, Kenake kupakaten ku kuyu si bengi hana isi ni atengku. Kati kuyu nguk munepongen sedih ni atengku.
Ate nge lemem denem ken kasih sayang e timul miyen wan gelep ni umah, Kelem ne betul-betul kelem si paling gure. Aku pe ulak taraweh ku engon ine betimpuh i sagi ni dapur penirunen siro ngaji urum mununu Lepat. Rara si pesam munepongen kami kelem ne. Gere ubah atengku, kenake aku mungadu ku heme si ku denemi selama ini. Lungi rasae, sehinge gere lepas ku kutulis wan lembar. Aku bahagie, olok bahagie. Kune gere? Sara heme si bergerel ine munampin aku i sagi ni dapur penirunen denem rasa e jep lo ni, seni aku kunul i samping e. Dor kenake dekat urum ine
Wajah ni ine dor mucaya belangi terkadang gere sangup aku munengon ne. Atengku gere berteduh gunah tene salah! Senyum si khas mutamah mampat rupe e. Gere lepas ku bayangen, lagu caya ni ulen minah ku salak ke. Belangi gere mera rede mata munengon. Kunampin ine munengon aku urum rupe mucaya e, ine pe munutupen al-quran.
Kurasa gere ubah ilen ate ni ine ken aku. Ine Memenuhi hana si ku butuhi. Sawah serloni hana si ine bueten meh ne ken aku bewen ne urum ikhlas. Gere ara wan ni atewe muniro ulak hek ke urum tenege e. Si ara kune cara e munaos anak ke bahagie oya we wan ni atewe. Aku salut ken ine. Tulus pedeh sayang e nguk sawah bengi atengku i ubuh jeroh ni akhlake.
Kelem ne indah pedeh ike ku ingeti. I kala ine urum aku kunul siro mangan lepat si tunu Ine, seseger ine muluahen senyum, ine mungeni aku dekat, ine munatangen pumu ku ulungku mumerus ni wauk ku tene sayang e. Gere kubeteh hana wani ate we tapi bukti denem sayang e we si telas ne.
Ku inget ilen tengah aku kucak gere penah lekang ari ine, rasa denem sayang e mulebihi waktu kelem oya. Ate bersisu “Lemem rasa e gere sayang ni ine aku” kelem oya roa hadiah osah ine ken aku pumu lemut mu mungusuk ni ulungku urum sayang denem mu. Cumen kusadari seni, urum beden makin kul ine murasa nyaya munyiumen aku tapi sayang e gere penah ubah. Pehem aku ine Urum perusen pumu lemut mu i ulungku oya pe nge sayang gerale ine. Ine senang ate we mu nengon aku bahagie. Ine rasa ne bahagie ike aku pe bahagie.
Kelem oya ara sara kata si male ku perin nen ku ine,” aku sayang ken ine aku denem ken ine”. Cumen aku kemel. Kata-kata oya lekat wani ger ngong ku gere te tangkuhen tibe-tibe ulak miyen ku ate. Ku daten mu pari wan ni ate, ku nampin pas waktu e muyederen oya. Kata si dor kutunin selama ini. Dor kuingeti. Kudaten mulayang gere terkire.
Sekejep, mata kenake munengon ku ine lebih selese ku panang inengku sawah tangkuh luh ni mata gere begedep. Lagu ara si male seder ni ine ku aku. cerak sayang mungkin, arih-arih ine muperusen ulungku lagu biasa. Ine pe muminahen pumu ku pesam ni rara ulak miyen mumerusen ulungku. Gere mokot ari one ine pe pecengang ku aku siro munatangen ulu ine muluahen senyum siro kedek kucak.
Senang rasa e munengon ine kedek siro bercerak lemut, ini si kunampin lemut te inengku bercerak. “anak ku si mutuah uji engon kukuen kukiri gere ara ilen ubah ari simulo aku (ine) dapur peniron, alas penomen, urum ton pelongohen te tetap ilen, jeroh ilen, tun sine sebelem pasa isien kao kunul mesamen beden. Kune atemu mubah ke denem mu ken aku”. Kene ine.
Ate ni murasa bengi lagu nyawa si male tangkuh ari beden mumenge laeng ni ine.
Jeweb ku : “ine si ku engon den kurasan kelem ni ara si mubah oya si kusedeh hi seni, tun sine murum kite taraweh ku masjid tapi pasa tun ni ine nge taraweh i umah oya si ubah ne, cumen ike atengku gere ubah lagu pesam ni rara denem ku ken ine.”
Ine : “ besukur kite ku tuhen anak ku i demun ne ilen kite urum ulen si jeroh ni, ini le nikmat ni tuhen si osahe ku heme e i kala sehat kite turah bersukur i kala sakit kite turah seber, ine pe dor denem bier pe ko gere denem ken ine, ine murasa bahagie selama e ike ko pe bahagie. Gere ara ine harap benne, selain do,a urum kebahagien mu anak ku.”
Aku pe ongot siro Berpikir. sunguh cerak lemut si tangkuh ari ate we urum sayang e.
Aku : “ine i kala aku bahagie, meh ne ku osan ken ine. Seni aku pehem meh ne si buet ni ine oya meh ne ken aku. Berijin ine, aku sayang ken ine aku denem ken kasih sayang mu ine.”
Murum mujadi sara Ahere kata-kata si kutunin selama ini tangkuh kelem oya. Luh ni mata pe tangkuh mujaril kudagu.
Aku : Berijin ine, aku sayang ken ine.
Ine : “anak ku tangkuhen renye wih ni mata mu enti kase puren kao anak ku mongot muderu ari kerna beloh ni nyawangku. Anak ku, enti bewen ne kebahagien mu a osan ko ken aku. Tuninen teba ken kebahagien keluarga mu puren ike kao nge luahi. Ni ine genap murasan kebahagieen mua deh oya pe nge genap bahagie e.
Gere tertehen luh ni mata, kenak ni ate mongot muderu gere terkire mumenge cerak sayang e. Siro munomen ulu i tempoh he, ine pe mungune.
Ine : “wen,
Aku :” hana ne.
Ine : “seloh mi we kao ulak ku ranto dagang.” Kene ine urum leng si lemut.
Aku : “Insya Allah meh reraya mi we ne.”
Ine : o,, wen i do’an ko aku buge tersehat kerna ulen pasa ni do,an te murah i terime tuhen. nge engon ko ine sat-sat gere sehat usahan nen tertamat kuliah mu gere kite tiro beloh ni nyawa sebelem meh kewajiben.
Ate pe karu gere terkire mumenge laeng ni ine “ hana maksud te ine ni kati bercerak lagu ini.” gere meh ilen ku pikiri ine pe becerak miyen.
Ine : “ara ilen nyawangku nguk ilen kuluahi kewajiben ku te ke gere ara neh” ine pe siro mumerusen ulungku.
Aku : “Boh mi ine ku usahanen tertamat” harapen ine mujadi semangat ku ateng ku. Gere salah ine mumaren cita-cita ku aku? Aku berusaha ne ike ine mu ijinen,
Ine : “ buge allah munosah jelen ken ko anak ku”.
Gere ku duga ine munangkuhen wih ni mata urum rupe si mucaya tene bahagie, seni semangat pe ulak miyen ku ate kucak.
Ine… kusuk ni pumu lemut mu, tetap mubekas wani perasaen, sayang mu tetap mulekat wani ate, gere ku tiro luh ni mata tangkuh cumen gere tertehen munengon sayang ni ine, gere sie-sie ku tangkuhen luh ni mata i tanoh gayo, murege ilen sayang ni ine ken anak ke. Sara heme ni tuhen gere berteduh kasih sayang e oya le “INE”
(Bener Meriah, 11 Agustus 2011)
*Mahasiswa Gayo di Medan Sumatera Utara
