Oleh. Drs. Jamhuri, MA*
Presiden nge ara, menteri nge ara, gubernur nge ara, bupati nge ara, camatpé nge ara den bewenné nge méh ara “kin sana né sekulah”.
Ungkepen oya gati tepengé ku kemiringte, bierpé kadang cerak oya kin berakah sesire kunul i dékér kendiringni jelen, atau sesire niru i gerdu ton penjegen, tapi ke ulak kite kukuduk pasti kata oya ara sejarahé, cumen sejarahé gere turestu ku peningetente, si jelas ungkepen oya boleh jadi kena malas sekulah atau-a kena gere demu buet setelah selesei sekulah atau-a kuliah.
Sebagien jema mujeweb, paké si kin pejabat séni kegere selamaé kunul oné, sawah waktué pake-a pé turah ara gantié, kadang kegerepé sawah waktué, Tuhen kadang bekenak lén. Kena oya kati kite sekulah ! Tapi éngon anak ni Polan so nge kuliah jep-jep si, meh sesidahi belenye gere we demu buet, sedangkan si demu buet-ta si musedere iwan kantor-a. Cuge éngon jema si nge bebuet-ta pasti ara we sudere-é oné, atau pasti ara we ume urum empu si nge juelne.
Cerite oya bewené géh kene jema séni murip pesimis, jema gere pecaya kin Tuhen juge gere pacaya kin dirié den kenguk enti tunung, sebeb ke kite bepikir lagu noya masa depan Gayo den urang Gayo osop, sénipé delidi nge jema ari luer lulus tés kin pegawé i Gayo, boleh jadi jema si géh-a lebih pane atau mémang jurusen si kunuli paké-a gere ara urang Gayo.
Tengaha ketike aku tamat MAN kuliah ku Banda bangga pedéh aku, kena ara téba pong-pong gere sempat kuliah. Betawe waktu tamat kuliah renye kin dosen, perasanku delé pedéh nge ilmu si kudepet den nge genap. Tapi ara peraturen ke sengkiren kenak tetap kin dosen keta turah samung mien kuliah, oyapé kulalui den perasan nge genap tetap we ara. Den si lucu perasan panén kita ari jema gere mera osop, tapi bohmi, buge perasan oya nguk kin pendorong kati dor semangat mungenal ilmu, kena wan munutut ilmu gere ara istilah “pembubuh”. Jadi benné si kite baca, kite pengé, kite éngon mujadi batang édang.
Nge tamat S2 perasan nge genap muncul mien, kena sana si kin syarat tetap mujadi dosen nge terpenuhi den juge hékdi kuliah sénpé méh. Néngon ku jema si sekulah demué we mangan, jema gere sekulahpé gere we kaya, nietten mien ku Tuhen, sekulah mien. Kena kené Tuhen : “jema pané lebih atas derajatté ari jema gere pané” tentu ke gere bang oya pelin, kena nietne demi Tuhen buge rejekipé imudah-Né.
Nume cerite ngku kune kuliah si male malé kuceriten ku si mubaca tulisenni, tapi ara si paling penting. Ara perasan sombong wan dirinte ketike kite nge tamat sekulah, den ara perasan ilmunte nge dele den nge ganap, sebenaré wan mununtut gere ara sara ejerenpé si mumerin ilmu ni jema nge delé den genap.
Ara tulu tingketen ilmu, ku kite si sekulah turah i betihi. Pemulo pedéh ilmu si kite baca muloi ari kucakte (sekulah SD/MI) sawah ku tamat S1, ini kesempatente mubaca, baca buku barik sana, semakin delé buku si kite baca pasti lebih jeroh. Si turah kite ingeti wan masa jenjang pendidiken ini ilmu si kite baca manfaaté lebih delé kin dirinte, kite gere mu ilmu ilen munilei pendepet ni jema lén betul atau salah. Disamping oya masa ini kite masih minerime ilmu ari jema, bier ari buku, ari guru atau ari dosen sekalipun, kemasa ini keta kite lalé kite gere demu sanahpé. Oya kati delé jema kite éngon ke tamat ari sekulah atas, gere ara ilmué demikian juge jema tamat kuliah, ulak ku kampong. Sawah kampong renye lalé, ilmué murah di osop (walaupun ini kadang kasus, arti gere bén jema lagu noya).
Ke jema kuliah lanyuten ari S1 (S2) biasaé, masa ini nge muloi munyeder sana si penah i baca, oya bang kati ketike kuliah sitikikné we dosen nosah materi, selebihé renye masing-masing mahasiswa nos makalah, sawahen ku pong-pong si sara kelas den si munuet mata kulah si dis. Kendatipé beta gere berarti tulis sepelin, artié si tulis-a turah ara sumber (arisi kite wet). Jadi sederen ku jema si betih den kune ara-é, jema si kite seder juge gere ne kira sesat atau salah jelen. Kena si kite cerakan ngenguk kite buktin.
Nge delé buku si kite baca, nge delé ilmu si kite sederi ku jep jema den jema pé gerené salah jelen, te ngeke genap ilmu si kite perah. Tentu seje gere ilen, kena sana si kite baca den kite seder selama ini ku jema, gere penah ilen kite kunei baik ku dirinte atau jema lenpé gere penah ilen kuneié ku kite apakah ilmu si kite baca atau kite seder nge betul-betul benar. Enti kasé si kite perin jeroh selama ini, rupen jeroh-é kasat mata we, si kite perin belangi selama ini rupen belangi I rupe we, sedangkan atewe gere jeroh.
Jadi ke kenakte malé kite betih si nge kite pahami selama ini jeroh atau-a gere, keta turah enti teduh belejer, ke kené ahli pilsafat : “jema kin rejepé kenake pilosuf”. Hana kati ke beta, sebeb pilosuf-a pemetihné gere si kasat mata pelin, naru pemikirné karap, betihhé sana si kenaki jema. Tentang ini delé jema gere setuju, kena disamping susah ngenalé den gere delé jemaé juge pendepetni jema kin reje gere dalih panétu sipenting nguk munatur jema lén kati bebuet (ulu kudi).
Ninget aku kin cerakni alm. Prof. Dr. Safwan Idris, MA, Kené : “Jema doktorpé kegere rajin mubaca, mera osop ilmué. Tapi juge ke gere doktorpé tapi rajin mubaca, mera delén nise ilmué”. Te sana kati turah sekulah keta. Murip i denieni ara geralé legalitas den standar, legalitas den standar si nguk kite turuhen ku jema oya ijazah. Ke delépe ilmu gere mu ijazah gere te perin pane, kena oya kati kite tura sekulah.
