Kerajaan Isaq i Tanoh Gayo

GURE di mubaca Sejarah ni Bangsa Gayo. Makin dele cerite, makin kaya khasanah budaya Gayo. Lagu cerite Lingga I Tanah Karo. Sayang, gere bewene terjamin kebenaranne. Tapi perlu kite lestarikan, sekedar kin pelejeren urum kekayaan khasanah budaya Gayo.

Ara sara kekeberen si nyaris kite lupen. Bahkan gati pedi mucampur baur urum cerite tentang Kerejeen Linge, yaitu Kerejeen Malik Ishaq. Oya kati pudahni, kampong Isaq I tulis urum huruf ‘Q’, nume huruf ‘K’ karena berasal ari geral ni Reje Malik Ishaq I kampung Isaq.

Gere jelas data zaman selo, geh ni Reje Malik Ishaq. Si kupenge ari awan-awante, Malik Ibrahim urum ngie Malik Ishaq memerintah Keraajaan di Aceh Timur. Karena Sriwijaya male munyerang, Malik Ibrahim bertahan urum bala tentara e. Sementara ngie I perintahne munyelamatni kaum ibu urum kekanak, “mai ku bur so gelah gip. Suen kepile gadung kirimen kini. Ini perang kul dan mokot waktu e”, kene ku ngie.

Oya le beluh ni Maluk Ishaq urum rombongen kul sawah ku wan uten. I bagie renye kelompok-kelompok ni rombongen oyane. Ara kelompok Kute Rayang, ara kelompok Kute Keramil, kelompok Kute Robel dan kute-kute lain, I tuyuhni sara kerajaan yaitu Kerajaan Malik Ishaq. Gere gip memang ari Kerejeen Linge.

Malik Ishaq ni lagu cerita ni Nabi Yusuf, ara pitu anake. Bewene bergeral Meurah. Karena, Meurah bahasa Gayo, artie Reje. Malik basa Arab, Mahraj bahasa India. Meurah Bacang, Meurah Jernang, Meurah Pupuk,  Meurah Hitam, Meurah Putih, Meurah Silu, dan Meureh Mege si bensu.

Munurut cerite, Reje Ishaq sayang pedih kin si bensu Meurah Mege. Nengon oya le meh cemburu abang-abange bewene. “Amani gere adil. Kin Mege so bewene, kite gere osahe. Entah kite julen koan utenso”, kene sara. Renye bewene setuju. Oya renye tos rencana.

“Kami male ngaro, ama. Win pe niro beluh”, kene si Kul, Meurah Bacang. “Eh, enti mai ko win a. We kucak ilen. Taring kase. Gere tebuhe ileh mudedik akang”, kene ama e. “ Nunung, we ama”. Singket cerite, belum Meurah Mege pe mungaro. Tos ilet. Oya le I tunin wan Gue I geniring uten. Seni terkenal gerale “Loyang Datu”.

Begitu ulak mungaro, Reje Ishaq bengis sesire mongot, gere lulus neh mangan. Tos akal. Buh dedak wan tape murobok, ikot ku uki ni asu. Pakati mungaro. Tunung kisu beluh ni asu a. Oyale akal jemen. Asune geremera beluh ari Loyang Datu, galip moyong. Oya le akhire, iueten Meurah Mege ari Gue oyane.

Kemel kin ama urum ine, anak si onomni nge nyanya rasae. “Aku beluh ari umahni. Gere terengon aku salak ni ama urum salak ni ine. Kemel aku”, kene si Kul.  “Aku pe le beta, abang. Entahmi kite beluh”, kene sara. “Ah, akupe keta belum urum ari abangni”, kene sarami. Akhire, onom-onomne beluh urum anak-anake masing-masing, sara rombongan kul.

Teduh wan uten, suen kepile gadung kin pemanganan. Alhamdulillah, bewene mujadi. Oya kati ara kampung Serbejadi. Suen jagong, murip oyape. Renye Jagong kin geralni kampung oyane. Karena nge sawah keber, pihak Kerejeen Ishaq tengah mununung bekas ni kekanak oyane, merah anak urum kumpu ni Reje. Kusi musangkane. Oya renya tos rencana perpisahan. Bersipongoten onom-onomne kena male berpisah. “Lang so mi we kite demi”, kene abang Kul.

Meurah Bacang ku Kluet, Meurah Jernang ku Sinabung, Meurah Pupuk ku Aceh Timur, Meurah Silu ku Aceh Timur, Meurah Mege taring I Isaq. “Kami gere terpisahan. Kami ku Utara padih reroan kami”, kene Meurah Hitam urum Meurah Putih. Oya kati ara Meurah Dua, seni mujadi kota Meureudu (Meurah Dua).

Singket cerite, Si ku Sinabung menurunkan Meurah Sinabung, si ku Kluet nos kampong Kluet Gayo. Meurah Silu mujadi Malikus Saleh dan beta bewene, munos kerejeen masing-masing menurut kemampuanne.

Meurah Mege taring I Isaq meneruskan Kerejeen Malik Ishaq. Anakni Meurah Mege oyale Lebe Kader. Kuburni Leube Kader I sekitar Pendopo Bupati Bener Meuriah, kudukni Pendopo Bupati Aceh Tengah. Telege I dekat Biskop Gentala, oya telege ni Leube Kader.

Beta kire-kire kekeberen si kupenge ari awan-awante jemen. Jadi, enti mucampur-campur urum Kerejeen Linge, gere berkaitan urum Gajah Putih. Mohon maaf, ike ara kelebihen, enti kin fitnah ge. Wallahu a’lam bish-shawab. (Luqman Hakim Gayo, Jakarta).