Oleh: Saifoeddin Kadir
Pusesepak pé aku, cerakku gere né bermakna
pupepongot pé aku, lingku gere né tenengé
gere né ku tungkahi enta aku jema gemadé
gere né ku matai enta aku jema mubota
kunehen.
sidahpé jerohku tengaha, seni nge leta
sidahpé cicerku tengaha, seni nge lengé
sidahpé mutentungku tengaha, seni nge pana
sidahpe lisikku tengaha, seni nge bené.
Alakku si mamur,
imen ko sara tetép munenting ku wan lut raya
luhku si rembebé,
imenko sara tenting wih lesap ku atan oné
bedenku ku empas mungenakan temas
sebubé arani jema.
tulenku ku egge mungenakan semperne
si bekune ni jema delé.
ibarat gulé buh kam aku,
lagu gegerdip bengkak mata
ibarat manuk buh kam aku,
lagu kukur gere tumung borékké
ibarat bunge tubuhku ngelayu,
dong ku gerené atan méja
ibarat baju ragi nge luntur,
nge ubes jermet méh murensé
kunehen, betta kené kam betta
kam tetah tentué
nume né aku ikeketta
nume né aku imelegé
kune alehé betta langkahé
kune dodohé betta rebahé
kunehen.
********
Takengon, 1960
Saifoeddin Kadir dengan nama pena Zuska, lahir di Kutelintang September 1926.
Mulai bergelut dalam bidang seni sejak menjadi pelajar PPM di Takengon sekitar tahun 1942.
Aktif menulis naskah sekaligus pemain drama. Veteran Bagura ini juga aktif di bidang seni tari. pensiunan Dinas Pendidikan & Kebudayaan Aceh Tengah ini kini tinggal di Depok, Jawa Barat.
