Amalah Ari Kenawat
Ini sara cerite wan uten rime
Kancil urum kule menet kin reje
Nge munuruhen diri ku berbage heme
Munucep janyi sumpah setie
Gehni kule turuhe behu
Aku si terpilih nge barang tentu
Kena kuring bentuk ni tubuh ku
Kaul kucak nge pasti mumilih aku
Keta ni kancil pe gere mera kalah
Munangkuh ni laing dor bersorah
Berbage cara dor i petetah
Kune kati kule kalah munyerah
Laen mien laing ari engkong
Si bertiak atas berperi sombong
Kule gere ku dukung kancil gere ku sokong
Tikiken buet delenen moyong
Geh ni badak nge laen berperi
Ike aku gere mudukung langkah ini
Ari kena selama ini dele ni janyi
Lagu gere sara pe nguk i percayai
Kintis pe berkata arogan
Kami si kucak ni dor kin umpan
masa kampanye osah harapan
Ike nge kunul kami kona tekan
Ike si betul nge turah kami
Berkata mien ari kelompok muni
Kalah menang gere kami pikiri
Kena kami nguk mulumpet kuso kini
Laen mien jeweb ni kedih
Selama ini si ber ate sedih
Ari kena ara bertebang pilih
Kule urum kancil berpilih kasih
Bahtiar Gayo
Muling mienne manuk engang
Reje bujang aku italu heme
Rum deso ni kuyu aku berdediang
Nguk kupanang lues denie
Ari atan ni cabang rintah ku rike
Bur rum pematang nguk kujege
Ke urusen bidik daleh si uke
Kami si cerdik lagi terpanang
Gere ruh ningkoa kene kalang
Urusen temerbang aku si lisik
Meh musarik kurik ilahni belang
Gere mulekang ike kupecik
Ike mujungker turah ku aku
Sana si demu nguk kubalik
Rungkilen gerelku heme munalu
Jangut bedenku nge lagu tersik
Aleckave Bersah
Mesut mien somana perok
Ike kin reje aku paling cocok
Kam bebewene gerene recok
Kerna ari atas nguk tingok
Ike kao kin reje asal gere cocok
Ruhen aku kene cangcingok
Ike kao mera muremok
Senuen ni jema meh murobok
Meling mien so abang kilik
Nguken aku ike male i lantik
Bedenku kucak lagi mersik
Mujago mien ike masalah pelitik
Tungel Belang
Mesut mien kurik uten
Aku ara sana kati ilupenen
Ike male bededik aku pe tehen
Kire kire nguk kin andalen
Sengkiren aku kalah
Patimenen kin pemecah
Si behu behu kase ku tetah
Kati enti usik we wani umah
Ike masyarakat si dele gampang cara e
Kite talu artis bier kati lale
Kite osah mien selpahe
Meh oya kite keloken ate we
Pitkawari Cobat
Nge netuh laing ini bebiri
Kin pelitik ni kami gere peduli
Bier pe kami jarang niri
Dor i kenali kami wan ulen aji
Kami gere dalih laing bersorah
Kancil urum kule roane serakah
Selama ini si nge kite erah
Oya kene kil jerapah
Terserah bewene ike ari kami
Nge meling mien ari babi
Si penting kami nguk mucongkor kuso ku ini
Enti kancil urum kule pelin si murugin petani
Tungel Belang
Telkah munerah ate we gunah
Nerahe pemarine mera ku mahkamah
Pake ni bewene gere siep kalah
Bewene mu ngenaken gah
Nalam ne temas mujadi reje
Munurus jema dele gere kire kire
Amanah turah ara wan dede
Ike gere puren nyanya kite
Nge i erah waktu si lalu
Ku mahkamah jema mukekeru
Perkara berebut kin reje
Seba si kalah akhere mugile
Amalah Ari Kenawat
Kite enti ambil pusing kene baning
Bier pe ralante gere pantas urum kiding
Si penting kite gere muputer jening
Wan murip legih murip gere mupelanting
Ini aku nge sara conto
Tangkuh laing mien ari koro
Buet ku mangan soboh ku iyo
Sahen pe gere mera beriro
Geh ni tikus Aku si gere kiruh kiruh
Kena kin aku bewene ruh
Gere ara paong gere ara musuh
Si penting aku nguk ilen munusuh
Catatan: Berbalas pantun ini, bila semuanya dinaikkan ke media ini akan sangat panjang, kami minta maaf tidak semuanya kami naikkan.
Syair ini Diambil dari FB Amalah Ari Kenawat, Minggu (20/9/2015)
