T U R E S
Gere neh mokot kite pilkada
Nge muloi tampil calon sara sara
Teba nge ara tebar pesona
Ari kampung ku desa desa
Lagu dele di kengon menet kin reje
Berminat mubangun tanoh gayo
Kin cerak sunguh atau cerak besene
Laing berakah atau laing sempolo
Ike seni beweni obral janyi
Berbage program oya si kaji
Rangkul ari arap kuduk kuen kiri
Arih arih susun strategi
Gelah ninget mi kite petuah jemen
Galak termulo sesal terpuren
Sanah pe buet gelah kite pikiren
Gelah tures mata munengon
Genap nge si nge munge
Agih mi kite kin sibelem
Jinger mi kemiring mumenge
Gelah i pikiri relem relem
Enti luke i ujung jejeri
Sara pumu turah kite tusen
Enti entap ni seribu janyi
Meh juelen raom sara keben
Mata osah tuhen kati tures munengon
Kemiring roa kati jinger penengenen
Enti penge sisu aru kiri kuen
Kati enti kin penyesalen puren
Tabi……
Tungel Belang
Simenet kin reje ni jema gere dele
Cume pake a we sabi diri e
Masyarakat umum cume mudate
Tapi akhere kin tetah tentue
Mungenaken suara demu ari masyarakat
Berbage janyi renye i peri
Bier mi jarak atau pun dekat
Ku duduk ni tenge renye i rai
Kin reje ni erep muluahen nesu
Bewene halal tipu munipu
Urum pake umah pe gere demu bulu
Bewene mungenaken nomor satu
Kite doanen padih enti kiruh
Apalagi ara si berbuet rusuh
Si rugi kite we empu ni tubuh
Ike si kalah jamure pasti ku paluh
Aleckave Bersah
Ari kuen kiri laing ku penge
Deledi si bermenet munetah Gayoni
Bewene mumerin we si pane
Ike kite pilih pasti gere rugi
Empus taring nge i rai mien
Si mokot berdate ari ingeten
Munetahi eneh male munyuen
Buge kin hasil bange puren
Si munyempak eneh olok simen
Bewene menet kin hasile puren
Mejen paong nge kin lewen
Mejen bewene perine serinen
Bahtiar Gayo
Buetni desne jema muginte
Batil ijurah pinang ibelah
Munarap pemen si galak nate
Isi ni tape oyape ipetetah
Turah beramal tidur bernipi jege
Kati semperne enti ku bele
Ipererasan ku jantung limpe
Bier si beret mata gaeh mujule
intan permata asa nge ara
nge bepari iwan ni bumi
taring kitemi si berusaha
iperah nyata isi ituni
Resam ni insen atan denie
Naru ni kekire dele bike
Ara si menet male kin reje
Oya hak ni heme daleh irike
Mutentu penadi kunul iampang
Gere bebarang kin uluni kudi
Gelah pane nukur bebayang
Kati enti musirang tubuh rum usi
Ecek Suku
sara anak we bawal wan kulem
simunekik iken rami pedi jema.
dele pedi tulen kite engon mutumpuk
usi si buruk gere ara kite engon.
dele pedi lebah unik mungengong
tapi gegoyong simu motok luang.
Furqan Gayo
Sawah masa si turah teduh
Kenal ganti penemah suluh
Nurut janyi asal nge sunguh
Nge kunul olok di sepuh
Jebeten sebenare amanah
Tanggung jeweb e i akherat
Ike niet gere krn Lillah
Iwan kubur kase kona ikot
Pitkawari Kobat
Gere ku urumi lagu pekekit
Ku sorah laing terih di aku kin penyakit
Gere ilen mujadi nge tetah serit
Gere ke puren kase timul jangkit
Si tampil ni berbage profesi
Ara si nge pensiun ara ilen mantong pegawai negeri
Bewene lagu munuruhen putih ni salak diri
Oya si i teturuh nge jep sagi
Amalah Ari Kenawat
Ike munginte teniron nge mepat
Kedue belah pihak munyusun langkah
Sebelum mujadi tungkuk ni ulu gere lagu pejabat
Ike nge kunul berkata jengkat laing bersorah
Nge kite engon selama ini
Sa kin reje delenen peran istri
Kite penampi janyi si ari mulo mi
Ike male mudemu berhedepen urum assisten pribadi
Seni dele si mugile jebeten
Sikut bewene ari kiri kuen
Gere I pikiri akibete puren
Si penting tuke mulo I korongen
Asa kadang pendukung ni berlaing pacah
Lagu bewene I jurung ku lelah
Ike langkah ini abang maju turah
Enti pikiri menang urum kalah
Tengkeh Gayo ini diambil dari Face Books Amalah Ari Kenawat.
