Assalamu’alaikum wa rahmatullah wa barakakatuhu
Reje, aku si bercerakni ari doa sempenani perang, mu pangkal kerje, mu sukut nge kamul ralik juelen. Wali porak, wali sejuk. Cabang nge murai cabang, ranting nge mu nangon ranting. Biak gip/jarak, biak dekat si nguk iperin rempak nge bilang ré, susun nge bilangni belō. Gere né ara si taring maring.
Reje, risik urum kōnō mokot di nge araé ari Rekel, turun ku entah, ari entah turun ku muyang, ari muyang renye awan, renyel ku ama, ari ama barō sawah ku kite besilō ni. Si nguk iperin nge mucap ku atu mulabang ku papan.
Reje,ari awal ni buet si katan serah merah. Selangkan ara kené ure-ure, opat ganyil lime genap. Si kerōh kén inōm, si jernih kén pembasōh. Beta kata olehte. Nunung edete kati sah kerje mungerje jemen pudaha.
Reje,lahir buah até jantung rasa, pertama iturun manin, kedue ikhitanen, ketige iserahen ku ama guru, ke empat warusé berwajib, ringenné berberet.
Reje, wan kemuduk ni lō ni, kin cicō ni manuk, kin kelik ni kalang, ari bulet ni pakat, tirus ni genap, nge le kami denangen alasé, nge le kami cecèpen ken belō si munōn pitué.
Reje,kusisun kire pora ike bedalil ku edet te, si malé kén biak teni. Nume si bergeral datap ari Batak, nume si bergeral ranup ari Aceh, nume sirih ari Melayu, tapi bergeral belō ari Gayo kampunge……
Reje, bersesèrènèn kite ku amal tidur nipi jege, kire gere musier, gere muhali, gere mupolok, gere muliki, singuk kite perin mampat urum belangi insa Allah buge betami kasé agamaé pé, urum budi pekertiè, buge lepas kasé kén alang tulung berat bantunte.
Reje, kén sarat yakin tene kuet, sarat denem tene muninget. Kami nahen ku tenumpit ni Reje, beras padi tungket imen, pinang ari si mutampōké, belō wan rudang, mayang ari Serudang, kapur kacu bunge lawang, konyel pe ari uten oya peserinen ne munangoé, iringi sara rilah ringit tene idung, bertetunung tali puter tige.
Reje, kur semangat, kami jurahan sara mungkur uten, wih muter si gere mera kering, lopah tejem si musembilue, kati iyèlès ni Reje kén pangir mutuju, buge pulih zet, pulih sipet, pulih nyawa, pulih tubuh, pulih anggota tujuh. Ike si bise buh tawar mi, ike si mugah buh magih mi, sejuk peruntungen né, gelah mudah rejekié.
Reje, kite manat petenahi mulo ipakni, iejermarahi, kati wé kasé remalan enti begerdak, mujurah enti munyintak, becerak enti sergak urum bubak, buh gelah lagu santan mulimak i bébéré, tikel berbunge i delahé.
Reje, oya wa tose si nguk kunahen ku sarak opat, reje si musuket sipet, imem si muperdlu sunet, petue musidik sasat, rayat genap mupakat. Reje mubanta, imem mulebe, petue musekolat, maap ku kaum biak urum sudere si ara wan batang ruang ni.
Wasalamualaikum wa rahmatullahi wa barakatuhu
Jeweben Sarak Opat
Assalamu’alaikum wa rahmatullahi wa barakatuhu
Sudere-sudere rawan banan, kul kucak, tue mude, tuen rintah bebèwèné si isienni. Kami belesen bang pora keranante, perang mupangkal, kerje musukut seni. Utang si opat, warus berwajib, ringen berberet, nge sawah hat inge é. Bade kuyu remalan gere tersesilun, uren topan wih mugemboyah gere terampōn, buette turah wa mujadi, edet ni Reje turah wa ilalui.
Ari bulet ni pakat, tirus ni genap. Ratip musara bilang belō, si berat nge ringen, si naru nge konot, si nyanya nge temas, si bise nge tawar, si mugah nge magih, si jarak nge dekat, enta kune galakte enti muselpak, ayunte enti mupolok. Alhamdulillah ike bededelé urum bererami, ike atas pé bur, tuyuh ni tapak, ike lues pé langit lepas kite tangak.
Si sawah ni perang, mupangkal kerje musukutné, kami èngon ku edet, kami dema-dema kuatur, kami simak-simak kuresam, insa Allah kami pé nge paham. Ike narue nge kite éngon ku ines, ke tungku èngon ku tau, ike sisir èngon ku awal, ike mata èngon ku pelu, ike benyer èngon ku gantang, narue gere ne kite setai, kul kucaké gere né si dokopi, buetni nge agih-agihe.
Wan murip ni baréksana buet, awale turah berpemulon, ahirépé turah kasé berpenampongan, naru tali sara punceé, sara ralik sara ujung iurumen menjadi sara. Oya tamsil sara enti kite lupen. Enti sara kité ku mata nilao, wan telbong enti sawah murip kelah, wan jumpun enti ara mu pulo, wan cing enti ara mu kilo. Geh kasé rahmat apabile kite sara peden, geh kasé laknat apabile kite mupecah ataw mudewe.
Boh mi oya selapis kami sawahen ku kite ken amat-amaten, ken tikon remalan, ken suluh sediken gelap. Kemuduk nonya keta gelah kite tujun mi bang ling ni ku ipak ni.
Anakku, anak ni kami, pengènko mulo ling ni kami si tetueni, warus mu iwajiben, ringen mu iberaten, oya nume geli aténi kami ken ko. Gere ko kami tulak urum serde tulak, gere kami senawat urum kayu luis anakku, enti kasé gere ibetihko oya sunah ni nabinte ari pudahami, wajib ukumé.
Konot mu nge bernaru, kucak mu nge berkaul, ara nge si araé kami ku beden tubuhmu, baik akal urum kekire, walaupun beta anakku, kami sawahen miyen kesah alus ni kami, buge enti kasé luput urum lupen ipakko.
Murip ikanung edet anakku, maté ikanung bumi, murip turah benar, maté turah suci. Ling mu anakku king mutentu, ke narue gere lepas tersipeti. Ling ni kami ni pé gelah jeroh ipejamuriko, ari kemokotné kasé makin ibetih ko sana de hakiket urum hakikié.
Boh mi kati mu terang kami sawahen tikik kin tujun ni ling ni. Murip ikanung edet anakku oya peger ni Agama. Becerak ko kasé anakku enti sawah bubak, berperi enti sergak. Boh lagu ling ni kami sine, bercerak kō gelah lagu santan mulimak i bibirmu, lagu tikel berbunge i delahmu.
Remalan kō kasé enti begerdak, mujurah enti munyintak, atému turah mumin, tanganmu gelah murah, salak enti osah kerut, budi pekerti turah belangi. Si tetue imelien, kekanak isayangi, si nyanya ike ara rejekimu, gere delé tikik itulungko bantu ko anakku.
Terjah empah, tangak tonga, keliling juge, kahar kaharullah, buh tikik pé enti ara iko, kena oya sipeté kemali ipak, sumang si opat ijauhi ari kite anakku. Sikatan sumang pecerakan si kite peri buh enti sawah jin urum setan singah, si kami sawahni berseseren ku agamante.
Sarami siturah ingetiko, kune ko munedepi kami, beta kasé iedepiko ari ume si depetiko, sipet ni si tunging buyung, dedawan lipet sikipes bayur, si mirah mata enti sawah ara iko anakku, kéna oya kemali pedi ipak. Ke turah lemut berturut payu, cerak turah berpingang, peri si turah itudun.
Tene ni buet anakku, ko rerowanmu turah sebegi seperangen, temas urum-urum, temas nyanya bersitunungen, bersipengèn bersiejeren, selangkan ara kené tetue, ike até murai até, ungké pé rasa gulé, ike até gere murai até, bawal pé disné lagu bangké, tekedir muterkuk kuren urum senuk. Enti sawah kalang pepot mujadi rara, kètol rok mujadi nege.
Anakku, si lime waktu si katan wajib porapé enti taring. Oya tiang ni agama. Rukun Islam, rukun Imen oya ken amat-amaten, oya isi ni kitep sucinte. Alhamdulillah anakku kami suntuk mudoan mu buge mujadi anak si mutuah, anak amal saleh ni kami. Ike itunung kō kasé ling ni kami ni insa Allah langit mu gere mu gegur, bumimu gere muguncang.
Enti juh pikirenmu, enti awang ken kekiremu, segermi kami sawahen wan batin alus ni kami, kami mudoane, panyang mi umurmu, mudahmi rejekimu, enti ara si mulintang sana si buetko, Tengku si munyerahen ko ne ku kami, selangkah ni se, selangkah ni kami, pulih mi zat mu, pulih sipet pulih nyawa, pulih tubuh, pulih segele anggota, kur…semangatmu anakku.
Oya le we si lepas kami sisun ku ko anakku, ingetiko kasé seseger kami anakku, enti sawah ko kasé lupen kén blang pediangen urum denget ni pintu ipak anakku.
Assalamu’alaikum wa rahmatullahi wa barakatuh.
