Oleh : Amalah Ari Kenawat
Ku kao anak ku si tulu
Ini manat ku cuge i penge
Sediken aku gere ne ara wan sara waktu
Buge kin ingeten mu wan male nome
Anak ku umur resie ni tuhen
Ente kune kase beluh ku puren
Gelah musapat anak ku ter kiri kuen
Gelah jeroh i jule i ko rum teger ni imen
Gere ku taringen niko uten si bertebang
Gere ara nikite empus si nge lapang
Umah supu merie si berlante uluh biang
Sikutaringen ejeren agama kin suluh tetang
Uten gere ku tebang pilih
Ume gere kin tem inih
Didisen gere mubilang silih
Umah gere berlante pungkih
Ike sara masa aku gere neh ara
Menghedep aku ku Allah taala
Gelah ingeti ko manat ku sibermakna
Kin bekal mu murip selama wan donya
Kin ejeren agama enti ko lupe
Kena oya kin suluh murip te
Gelah jarak kao ari sipet rie
Gelah dekat kao ku sipet mulie
Agama bubun kin tiang anak ku
Edet budaya kin prilaku sumang
Buet si pantas prilaku semparne anak ku
Buet si lepas kin tali penimang
Anak ku enti kase lupen kao berdoa
kati muhapus segele buet si dosa
Buge i padang maksar kite murum bertona
Kena oya tempate puren wan sara masa …….
20 Juni 2015
