by

Munengkah Waih (Berbalas Syair Gayo)

Lintas Gayo mengambil syair ini dari Face Books Bahtiar Gayo, syair ini semakin menarik ketika ada yang membalasnya dengan bahasa yang menyentuh (Amalah Ari Kenawat, Pitkawari Cobat dan Aleckave Bersah). Inilah syair mereka bagaikan gayung bersambut.

 

 Munengkah Waih ( Bahtiar Gayo)

Wartawan senior di Gayo Bahtiar Gayo ( Foto Zan.KG)
Wartawan senior di Gayo Bahtiar Gayo ( Foto Zan.KG)

persoalan ate male kurike

kisah nyata atanni denie

mucere anak urum ine

Garisni  tuhen ku sara insen

 

kisah ni  cerite petemun

nge turah cere entap ni cumun

sayangdi anak tengah icacun

tengah iayun lelon ni mata

 

sikerna ama oya ken wali

ku ine ude anak imai

beruwes ate  ine  penanti

gaehni bade isemer pungi

 

beganti ulen berbilang lao

ine pusesino ku simpang dene

Pukekune ku heme si dele

Wo tajuk reje  uwakni lape

 

Tengah melem  puge gerle

Punenimo  suntuk sabe

Kero ipangan nge lagu tube

Kuwas rerise o jantung limpe

 

Gere idareng lao ihemus kuyu

Siwah ulen  langkah mutentu

Pes nate mu opoh bajuku

Tareng ko aku  besebuku

 

Ken ningko mehne  kumerai

bier nyawa aku nge rela

asal selamatmu lahir ku  donya

ihlas nge aku imai si sara

 

Remukni beden gere kumelasi

Enti kao susah  sengsara

ke  rayoh gere tecari

siep kujurah sediken nyawa

 

sawah masa turah mupisah

gere teridah ko  jantung rasa

cecep rupemu male kuerah

ke ara umur mudemu turah

 

kusi ku emah ate si menye

ejel ni teniro tuah ni beden

kulale nen kao rembege

kutuhen si sara asa seserenen

 

salah ni amamu nge kumaafen

kuimenen ken uwak gerahen

upuh bajuku kao harapen

sahan inemu betih ko puren………..!

 

Takengen, 17 Agustus 2015

 

amalahAmalah Ari Kenawat

Meh ni petemun asa nge turah cere
Bier pe jantung limpe murasa luke
Nge turah lagu noya kenak ni ate
Anak si kaul ni ate mupisah ari ine

siwah bulen kao wan kandungen
Gere i betih porak urum uren
Legih ni tubuh letih ni beden
Nge takdir ni ine geh ari tuhen

Besilo kao nge lahir ku dunie
Urum senang ni ate ku emah menye
Gere ilen meh galak ku bersene
Nge turah muluah tali ari punce

Ine pe turah munamur lauh
Anak si kaul ni ate nge turah beluh
Mupinah pumu mubeda pengasuh
Kin penerang ni murip mubeda suluh

Kaul pe ate kin anak si mubeda ruang
Gere ne sebatang murip urum ine
Ike ara pe rezeki kusi ku jurah tatang
Nge mubeda pepasen mulaen tete

Kusih mi kuseder sebuku
Masa tue ku gere pat bersere
Porak lao kelem kudolot lauh ku
Buge anak ku enti temerke

 

Aleckave BersahAleckave Bersah

Aheiii wiiiiwwww
Meh umur mate
Meh petemun cere
Reta si ara nge mepat mpue
Sekejep we kite munamate

Nge mikot orom janyi
Morom mewen sara umah
Sanahpe terjadi hadapi
Buge tali si mikot gere muluah

Gegur meling gere berede
Uren turun i elem elemen
Gere tesapihi ike nge gere
Bierpe mutulun i damenen

PitkawariPitkawari Cobat

Kasih ari ine si olok semayang
Kin anak si kaul ni ate simupinah ruang
Nge mubeda tempeh urum belang
Si kin penayah murip penyamung selang
Ike kaul pe ate ku anak ku
Besilo nge mupinah bantal nome mu
Ber ues ate aku bersebuku
Tuah ni anak ku nge mulaen empu

Mubeda asa kusuk ni ulu
Ari kena pumu mulaen jejari
Pupeperus dede aku anak ku
Kusi die kele ku puren berpari

Tuah bahgie mi kao bayak ku
Bierpe kao mubeda perdu
Ike ara uah puren ingeti ko aku
Bier pe puren tubuh ku nge layu

Kuharap kao kin bunge harapen
Bier pe mubeda cara didiken
Entap ni musentung senuk urum kuren
Ama urum ine turah mupisah jelen

 

Bahtiar Gayo

Meh petemun tekedir ni tuhen

Nge beta janyi wan perjelenen

Buge ama ara pemekeren

Anak rum ine selo tepisahen

 

Bierpe kao mupinah perdu

Upuh ulesku ku inget selalu

Kutuhen doa ku mutuju

Naru mi umur kite mudemu

 

Sediken tekedir ni tuhen

Empu rembege gaih munalu

Doamu pedi ikirimen

Iaherat puren kite mudemu

 

Pikawari Cobat

Kena nge muselpak cabang sinaru
Nge mubeda rues urum tungku
Ike ara ilen osah tuhen umur ku
Gelah wan dunie kite mudemu

Kasih kin anak nge lagu waih
Gere mera pulih osop ari ate
Kusih pe kai puren mubagi selih
Kin ejeren agama enti kao lupe

Gelah mi aku ber ate melas
Buge mi temas enti kao nyanya
Enti puren kao bertangak atas
Gelas kao iklas malaen ine urum ama

 

Bahtiar Gayo

Sikerna ulung mutayang kubumi
Ken rempate sonong ni uten
Kite tiro tolong ku ilahi rabbi 
buge kabulne kite demu mien

asa seni amamu pe nge rowa
sara iuken ta sara itoa
inemu pe nge turah beta
bier mubeda kao turah rela 

tekedir ni tuhen morepku nyanya
dele si kurang nge nemah tubuh
enti ku atas sembeling ni mata
engon ko bumi taon ulung si ruluh ( Red LG)

 

Comments

comments