Oleh : Amalah Ari Kenawat
Anak ku ….. Umur ku nge lepas asar
Ulu ku nge ber seng putih
Usaha ku nge genap ikhtiar
Buet ku nge tamah mungilih
Macam berbage nge buet ku wan donya
Demi munekul ni kao anak ku si tulu
Gere neh ku inget masin ni poa
Kin penyamung ni murip mu kao anak ku
Gati aku munamur ni lauh
Demi kin kao ku osopen kemel ku
Ku tingkupi uah si ruluh
Gere ku inget kotek ni baju ku
Wan soboh renem kao ku taringen
Jelbang ku tatangen mungona waih
Raom si kusuen kin penuripen
Buge kejang payah ku enti kin sapih
Umur gere ne mude
Dele olok nge mukurang tenege
Penengon ku gere neh semper ne
Ralan ku nge muloi mugeride
Ara ke kase kao berkasih sayang
Ike tubuh tue ni gere neh mugune
Ara ke kao kase mupetimang
Ike tubuh rentani muniro jule
Ike kase masa ku nge sawah
Kao kin imem saat i mersah
Kat liang lahat kase tatang ko aku ter lelah
Merengko tubuh ku mu hedep kiblat ni Allah
Gelah paseh kao mubaca doa
Buge segele amalku i terime Allah taala
I tiro ko maaf ku setiep jema siara
Kadang ara silep ku selama murip wan donya
Gelah jeroh kase kao mungune
Ku segele ahli bait biak sudere
Kadang ara kase utang ku si aku lupe
Oya kin tangung jeweb mu si turah wan kekire
Berita Terkait:
