oleh : Bahtiar Gayo
Sambungan kata-kata Gayo, yang bunyi dan katanya sama, namun berbeda maknanya.
18. Cecep; a. Uji Cecep ko mulo jantar ni, nge ke musera powa ee? B. Anak Haji Zulfikar ke ko? Ku erah cecep amamu ara iko.
19. Gantang; a. inih nge ku beli ari Medan, taring suwenmi gantangni. A. sidah gantang kin jemae minyem rom ku aman Ikoni?
20. Geli ; a. aaaaa enti beberang jontok, pe geli jemae, muteragong kahe. B. demu ilah ni dene gere lewenne aku, geli bang ilen ate kin aku.
21. Imen- a. tene yakin kuet imen, sanahpe almal perbueten enti lupenen Tuhen. b. bierpe uwes atengku, gere ku imenen singe terjadi.
22. Kacang- a. dum na sedeppe ike kacang koro masam jing rum depik. B. lah jeroh keseke ipetimangko, enti renye i enko, jema wa le pekacang.
23. Kalam- a. kalam janyi te nge kusemet mate, ku mai sawah singkih kuwen, b. se besilo se gere neh ipergunen jema kalam kin tulis baca.
24. Kalang- a. bumi gere ter kalang, langit gere tersupu. b. meh mati kurik ipeciki kalang.
25. Kemang; a. belangdi bunge dahlia ni ike tengah kemang. B. se besiloni nge jarang kite penge jema isangkan kemang.
26. Lemang- a. enit kona minyak karetta, lemang kahe gere tegunei. b. kemang uluku menge kekatae, ne tuwe lemang.
27. Lempusing-a. meh umah suderete I Bukit isangkin lempusing. b. enti oloktu beketibung ipak, inget lempusing manyo kuwan iyung, ejeb tangkohe.
28. Lepas- a. lepas ke die ibuwetne, bohmi kite erah kune ahere buwetni. b. gelah lemut sintak ni peri,ike laing lepas gere mugune.
29. Lewen- a. demu aku ilah ni dene, jeroh ku lewen, uwesdi ateku ikiserne salakke. B. oya nge demu lewen , baro mudeme tingki urum tungku.
30. Lipe- a. inget iperdu ni uluh ha win, mera lipe berinang. B. enti lipe ko waih ike tengah uren kul, gere erahko ke tiel ilenne wih ni.
31. Lipet –a. eleh ningko jema jago lipet ipengen, meh muserit jema buetne. B. mu lipet ke sakamu, ta perahi guru liki kati itetah, buge tir jeger.
32. Lulus – a. gere lulus neh, sana si sesol, naran mutemak karungni. b. mangan gere lulus, nome gere mis, galep pude dangoh buwettte, bise bang rembegee.
33. Lup- “ nge ke lup korek wan kepuh, enti lupen tutup ko pintue,” b. Cuge lup ko berawang ni, relem ke?
34. Karam- a. karam ni kapal, bierpe buruk ara we taring labangne. B. tukang karam ya, sana si mai, kin urusen te puren. tarengen daleh imai winna.
35. Kekal- a. keko berimen torah yakin anakku, aherat puren oya ton si kekal. b. awanmu tengahna, munamah kekal, ike nekik iken.
36. Kekit –a. bise bang rasae, sawah iponne ikekit ne. b. Kune die nge sawah ke ipakne, pe kekit di ateku.
37. Kuah – a. bohmi, buet nge telat, taring kuwah mi we si ara, jadi oyape kin pelulus mangan. B. Rugi beloh ku uwer ike gere minum kuwah.
38. Kuduk- a. daleh neh parenko iarapni, ku kuduk adehne maiko. b. geh gatal kuduk ku ni, kayo kope mulo.
39. Malu- a. Malu turah ijegei, oya kewejeben jema rawan. B. enti buetko si rerume, malu edet oya wen.
40. One; a. sidah motor tenah ko one? B. uji perahi lah selese I one sine ku parin.
41. Pantan- a. Belangi di kupie, tanohe murempate, mu pantan mudenang, senang matete munerahe. b. pane keko mantan rayoh, pantan ko mulo, kona parang oyane.
42. Pantas- a. lemem bertona pantas berulo, enti taring maring. B. gere pantas bang lagu noya sintakke ku aku, bohmi serahen ku Tuhen.
43. Petukel a. Angkapen taruk petukel iempus so mulo, uluhdi ateku. B. ling ni Aman Polan na daleh pengenko, oya petukel mubungei diri. Turah iminyaki baro lisik.
44. Ramas- a. iramas ko mulo tepung oros ni, kati kite tos kin berahrum. B. gere tejem parang na win, ramas ko mulo.
45. Re- lah jeroh ko bekaca, I re mulo wukka. B. re di ateku ibubunne. Kune de kahe anak ini.
46. Rebah- kusi dodohe biasae kona rebahe kayu si tebang. B. sidah lo nge awan rebah, kami erah nge pien lo gere unyep ku mersah ni.
47. Resie- a. manyo wan amal resie ku, buge mujadi kin tuah ketier te ni. B. gelah pane munaso rasie kire enti betihi jema buet te ni, amak kahe.
48. Rampat – a. mu perak win no, kona rampat rum amae. B. torah itetah ku jema si pane, telase mu rampat ipakni sine ku kini nangkap wih wan arul so.
49. Sarul- a. gere tuho neh sarul le, hana muperak, entap metuh ari kayu. B. itetahen mulo salur ni wih, kati enti musawak mehne kulah nume.
50. Sengkak – a. lagu nyanya bekesah, sengkak ku rasa tuke ni. B. Win sengkak ko mulo wih rerak ume so.
51. Serap – a. rai ko mulo utem serap nume so, uren kahe gere jerang kite ni ipak! B. Gere serap ate ku ke ko beluh rum Irham ni, nantin ko mulo abang mu kati mutentu buetni.
52. Serge- a. seni nge rasae serge, belesni gelumang ulak. B. Lagu serge jangut ku ni, bidiken pora ralan na, tonni lagu si melen pora.
53. Serlak- a. enti le tu bubun ko wih ha Win, meh mu serlak ini. B. Nge mujengkele ceding ni kupini, minggu arapni nge nguk iserlak.
54. Sirem – a. sayangdi senuwen ni, torah isirem kati pulih. B. lendi sirem ni Aman Iqoni sine, gere gure kurasa sawah seni.
55. Talu – a. italu ko mulo aman ni pak kuumah ni aradi si male kami sawahen. B. sayang ni empus gere berurus, hana nge mujadi empus talu.
56. Tangkuh- a. Win tangkuh ko mulo Honda ni ku deret. B. “Ipak siye erahko lo ni nge reduk, tangkuh ko mulo upuh si bejemur”.
57. Tenes – a. Gere bang tenes kirimen si tenah, gere tures mata neh munerah. B. Edet jemen ike munenes oya minah urang. Tenes besilo nge dele curakke.
58. Tumpit – a. terbang ni tumpit mukekamang, b. ne kenyehe torah itumpit dor, gere tebuh kenyak kite sanahpe.
59. Turuh – a. turuh ko mulo isi tuninko, hek nge kami perah gere demu ilen. b. lagu meh turuh le umahni, nge nguk bebike kite netah supu.
60. Turus- a. sanahpe buet gelah turus ikaji gelah meh iren-ren, enti ras rus gere mepat. B. sidah turus kin gule tampang ni, lagu tikikdi we depette langkah ini.
61. Ules- a. nuuu ucitte, sara ules pe aku gere osahe. B. lagu mutengkedep le ules nome te, gere ke pat ketier.
62. Uluh – a. meh pangan bebur peger ni, turah iangkap mulo uluh kin belide. B. uluh di ateku, gere ke pat kirimko tikik kekaras ari Bintang?
63. Wau a. ku tama mulo wau, sa mubetehe kin rejeki, ara pong kero te. B. pecik ko kahe wih nasam ni rum wau ni dapur, isapun ku si sakit, tiro tulung buge jeger.
semoga bermanfaat dan kita bisa saling berbagi amin.
berita terkait : Unik Bahasa Gayo
