Oleh: Radensyah*
Mu kune nge kite….
Mu kune nge die…
Ini peceraken ku bebewente,
sekireé mulepis gere sengeje,
ini sibeningen ngetentu seje,
juge kite erah denie besilo
mu kune nge jema…
gere ne dekat ku agama,
jaraken diri urum ulama,
mengoh si ku kiri alae teba,
mu kune oya cuge i sino
mu kune nge Al-Quran…
Nge betul oya kin pedoman
tape bepari wan kaca hiasan,
muke rilahe i ulen ramadhan,
ngaji i aran genap serlo
mu kune nge ilmu…
si becerak gere mepat guru,
si beperi gere terang buku,
sibenar sisalah gere mutentu,
lale wan waktu soboh ruhul iyo
mu kune nge sekulah…
Guru si bingit gerene teridah,
murid si panepe gerene terperah,
ara si mayo, teba ulak kumah,
murid nos ulah, guru baro cico
mu kune nge ngaji…
Berganti ulen mukurang santri,
ikeni munafal teba temuni,
teba mongot muniro peci,
pengajin kekanakni gere beriro
mu kune nge umah…
Maghrib taring tv pe i erah,
gurilen diri bantal itetah,
anak besene gere bertungkah,
pr sekulah enge bertaso
mu kune nge jum’at…
Wan ruhul buet mukarat,
adzan mutalu ralanpe mukarat,
khatib becerak enge bermanat,
kite terlambat selop ilang ijo
mu kune nge pelejer,
tulis baca lagu nge musier,
nge bedate gere ber ejer,
bedediang sabe mu jinger,
gere pinter ke jamah jep iyo
mu kune nge sudere,
gerene ber siturin sidelene heme,
jantar lebih gerene bejule,
ni jema oya ini ni kite,
sara ine teba nge pelolo
mu kune nge awah…
gere mepat laing muluah,
hati hati sipet mufitnah,
ikudukni sunguh isagini berakah,
situasi ierah enti sempolo
mu kune nge edet…
male osop kurang bersiret,
si mudate munampin buet,
lagu munome gere inget uwet,
ahere musuet, isi edet gayo
mu kune nge keta…
oya kukite mutimang rasa,
lagu nge bage ini mana donya,
siturahe itetah cara,
pora pora beta kedah ne so
*Mahasiswa Semester VI Jurusan Tarbiyah Prodi Bahasa Inggris STAIN Gajah Putih Takengon. Beralamat di depan gerbang tugu Radio Rimba Raya, Kecamatan Pintu Rime Gayo, Bener Meriah. Email: indigondg655[at]gmail.com
