Oleh : Bahtiar Gayo/ Wartawan Waspada
Bayakku daling seserenku puren………
Selapis nge kumanaten falsafah ni wih. Buge manyo yang utok kepalamu, musera wan jantung limpe. Ike ibeningngi mutuahku, dele olok tene iosah tuhen iatan bumini. Dele olok singuk iweten ken iktiber morep. Hanati Allah munosah bumi rum isie ku kite heme?
Uluh
Anakku ara ke perhatenko uluh sitaos tuhen? Macam berbage gunee. Ara uluh biang, regen, serik (lidi), utung, ines taos ken suling si gati guwelko. Ari muterlok sawah ku tuwe mehne mugune ken heme. Le jasa rum manfaate. Uluhni bayakku muprinsip morep. Wan keras ni kuyu beirpe pucukke mulingang, muleleno, jarang olok uluhni murebah ihempas bade.
Ta tekik kumanaten. Hana falsafah, iktiber ari uluh si osah tuhen ku kite. Wan perdu nuluh ni asa mukusim, mera berumah tikus, berinang nipe. Ara mahluk len si pane mumanfaaten uluhni ken jelen morep.
Tengah kucak perasinne tuwis. Rum labu manis kenjantar lemak. Tejem sembilu bierpe tipis. Jing luis dagi si cabak. Tuwis anakku, oya nge resam itanoh tembuni te. Te maken kona pengat rum depik, bado, mut, nuuu anaku kunehte gere muninget.
Nangkap tuwis bayakku, bierpe lemut mude, turah becara. Mukosim bayakku, mera pukekor mubentat ilang. Beta we morepni mehne turah becara, gera ras rus kune kenakte. Ike sembilu woo upuh bajuku, oya pe enti bebarang, enti kecalko bierpe tepis. Murayoh ilang, murebek usi.
Wan perdu nuluhni oyape tikus meradi berdediang, kenge nge turah gaeh si mujolor, punep nep merah rejeki. Manate anakku, bierpe uluh si muperdu, si munguasai tempat, ara heme len singuk belongoh, beketier munetah morep. Beta kope puren, enti ken tuke dirimu we sipekeri. Wan ketiermu, wan retamu, ara rejeki jema len. Ara hak heme si len, gere mehne turah ken dirimu. Wan islam ara zakat, sedekah. Ara kasih sayang iwasa bayakku. Enti jukut boh usi rayohku.
Siye, pengeko tekikmi. Enti nalammu uluhni bejenyong, lanyo ku atas, temas nangkape. Salah gerbes, mera musetar ku dagu, munamur rayoh. Dele jema si konak tipak ni uluh. Hana maknae? Uluhnipe perlu ihormati, perlu cara munangkape.
Enti sintak kune kenak. Enti munuruhen beb. Enti ara sipet anggap enteng, bier hanahpe oya persuelen. Uluhni nge ejere kite, munangkape turah becara. Mubelahepe ara pelejeren si murege mienne. Ara keperhatenko kune uluh ibelah.
Sara iperjak semelah itatang, baru musetar mubelah duwe. Sediken puren ara erahko heme, munuwet keputusen, kona kuusi dirie bierpe salah tetap we ikapette, kona ku jema len, tetah perjak sesenar, oya mubelah uluh buwette. Nume munetah kati sebegi seperange, gere pergunenne cing ken neraca. Buge enti sawah kuko bayakku, sipet mubelah uluhni. Hanahpe persuelen lah jeroh ipetimangko.
Kenge erahko kune nangkap uluh, mubelahe? Salah angkap kona tipak. Betawe ko morep idenie ni mehne ara cara, ara hukum urum edet. Pergunen ate gelah jeroh, irerasan ku ate diri, kona ke buetni? Dup uluh sigere muate, iosah tuhen mera we munipak kegere ruh carae, temakin ku manusie kite kune kenak, ke salah-salah mera beluh nyawa bayakku.
Ara ke perhatenko kuyu keras, geh bade muhempas ku uluhni. Kune parie? Perasante lagu si murongkom bang perdu uluhni dum keras ni kuyu. Muleleno, mugegepil ku kuwen kiri, gere neh beriro, mungeresek.
Perhatenko mienne, rede bade kune uluhni? Sesok tegep agu sigere mutekuspe, gere mangik. Nguk ihedepie dumna kul ni bade. Subhanallah gere ke oya pelejeren si paling murege anakku. Tungkulen tegep. Beta we morepni, turah ara geda-gedi, turah ara temas rum nyanya.
Ke kite morep gere mupersuelen, enti uwes atemu, oya ke disne we kite lagu si opat kiding. Tuhen sayang kin kite iosahe kite ujin. Gere ujin tuhen ilen kite, selo bang depet ponten si jeroh. Mehne cobaan tuhen turah ihedepi, enti musangka ari cobaan.
Gere ke kemel ko ken uluh? Wan kuyu bade ihedepie rum dede lapang. Ke lebih mulie ko dibak uluh. Dep uluh siep menghedepi mehne ujen ni tuhen, hana kati ko surut? Terih, takut, munerah morepni?
Eyaa kenge nguk wet ko iktiber ari uluh. Dele gunee, tapi nangkape turah becara. Turah ihormati uluhni urum cara. Gere renye nguk ken silih urum belide. Ara proses ari munangkape, munarahe, murayul, sawah nguk ipergunen. Betawe prinsip murip uluh, lagu munulur benang nik ni lelayang. Geh bade, tunungne rum likak ni beden, bierpe wan gunah nate. Belangi prinsip murip uluh ni anakku. (Musamung )
Sambungan :
Manatku Ken Tajuk Reje (1) >(2) > (3)
Comments are closed.