Oleh : Bahtiar Gayo / Wartawan Waspada
Anakku, langkah rejeki petemun, mut, si sara si munentunne. Tengah ara kesah, buge ken iren-irenmu, penge ko tekek manat ari urang tuwemu. Ganti ni uyem wan melem bute, ken suluh bierpe gere lagu lampu. Ken amat-amaten, sediken kami mulo italu sisara.
Manusie wooo tajuk rejeku……………………
Heme atan denie ni gere ara sisemperne. Mehne ara silep urum lupe. Wan mukulebihen, ara seje cupee. Wan kekurangan oyape beta, ara we mukelebihen iosah sisara. Tene tuhen, kati kite muripni turah bersibantun, turah pane mutimang rasa. Gere lepas kite morep sesereng.
Ara ke iperhatenko waih? Si durus manut ku toa? Muputih bersih, atete rane mumanangne. Lagu mah mahhe jantung rasa, sisire beketibung, munemah basa mununung berawang. Beta moreppe anakku, ketike atete bersih lagu waih, lagu mehne terang denieni. Mehne lapang, segele ujian temas menghedepie, kerna turah yakin ate sititip tuhen ku rembege te.
Bayakku…………….
Wan waih tenang, mera we muligen, oya nge resam anakku. Ike gaeh muligen, waih musuri mucampur limen, asa olok gasut. Muputer jening mulempusingen. Murerakul, meh muaduk sana siara. Oyape mehne durus ku toa. Tuhen osahe pelejeren paling murege ken kite anaku ari waihni.
Kekona muligen, murerantuk mucapur aduk, meradi heme pipet. Dak akalle, lagu sanahpe gere tebeutte. Lagu mehne gere ruh, itetah tar ini salah, iperagih siso oyape gere cacak. Singuk iceraken, lagu buetni ujungnge mera ku mara.
Betawe moreppe bayakku, gere jeplo jernih lagu emun si putih, lagu waih ni dedisien, alam alamen depik sigaeh wan uren rintik. Ara terang ara we gelep, asa murip idenie ni turah mujudu. Ara salahte ara we silep lupe.
Ibarat waih wooo tajuk rejeku…………
Mumureh dene gere ku sikarang ku atas pematang. Asa ari pematang munete, muleliku selalu mutumpu ku berawang, durus ku toa isangkan aras, selalu renye lepas ku lut silues. Enti itamusko waih bayukku. Bier kunehpe belangie tamus itetahko, berbesi urum bersemen, lepas we waihni ku atas. Wan bengi ni waih, bier kunehpe atase tamus itetahko, lepas we ilumpetie.
Iktiber morep iosah tuhen ku kite. Waihni bayakku, gere mera atas pediangne. Kaope turah beta bayakku. Enti ku atas uluni jema berinang. Enti munurehen beb rum jengkat. Sediken tekedir ni tuhen, puren kao muripmu temas, mu ara isoah sisara, gelah ingetko falsafah ni waih.
Kutaon renah nise berinang, mujadi berawang ken galak nate. Atemu lah bersih lagu wih bayakku. Enti kuatas sembeling ni mata, erahko bumi taonmu jejak. Ike gaih muligen mulimen, ulaken ku sisara si munukum pekara. Enti juh akalmu enti dak kekerimu.
Anakku, sa mubetehe turahdi sawah ku hakiket, wan betulmu, ara we si hilet dengki, urum khienet, ta turahdi ke muligen, gaih waih kaol? Ike turahdi lah meh iren-irenmu kerna tuhen. Kenge ku hakiket nge tiroko jelen ku tuhen, gere we pat ikiseren, ta lah tegep syerietmu. Kenge ipantik enti neh ingut, kenge rum bismillah enti neh surut langkah. Serahen ku tuhen simunetah morep.
Sediken kao salah ku heme bayakku, ta enti uripi sipet ni kule, munuruh sawit. Turah ara sipet mulie wan atemu, turah niro maaf kao. Ku tuhen niro ampun. Bier ku simemude, ike kao salah, turah lapang atemu mujurah pumu.
Beta mienne, ike ara manusie si nge kangkue kesalahane, enti renye ningko tulakko rum serde kolak, ibesik ko rum senawat si luis. Osahko kesempatan ku heme si berate mulie mera muniro maaf. Tuhen si munetah tentu morepni heme, nuke pintu maaf. Dep Tuhen nosah kesempatan ku kite munetah diri ari salahte, manusie nume tuhen bayakku. Musamung
Sambungan :
Manatku Ken Tajuk Reje (1) >(2) > (3)
