Nos Website Make “Gayo” Gere i Koa, Cumen Enti i Buangayahen

Pekanbaru | Lintas Gayo – Munos website make geral Gayo sebaeke berasi-asi mulo, enti bebarang tos renye i buangayahen alies gere i urus. Terlebih waktu meh masa ni domain siturah i samung gere i samung.

Akibete mera ku kemali alies sumang penengonen urum pelangkahen den muremok generasi Gayo dan umet Islam umume, Oya kene serinente pelaku bisnis internet sekaligus web master ni mediante ni, Lintas Gayo, Salihin Putra, Sabtu 22 September 2012.

Sana kati beta perin Salihin, kerna ari peratinne i denie maya, ara mubilangen alamat domain si mumake Gayo gere aktif ne den marae nge terjadi ku sara alamat domain mumake “Gayo” isie sirume-rume. Olok sumang penengonen ike i uke.

“Kemel di kite munengone, ungerni jema i denie ni, kite bangsa si lagu noya, gep ari syeri’et agamante Islam,” kene Salihin.

Kuarap, enti bebarang tos website ike gere i semet waktu nge meh masae, sebeb ike gere semet renye i juelni empu ni usaha mekat domain. Sah kenak nguk mubelie termasuk pake kafir.

“A nge i gunen jema kin munoroh ni si kemali mata keta kuneh mi ya. Kemel olok kite selaku urang Gayo. Kurasa enti kami perin sana alamat ni website e ku pembaca Lintas Gayo ni,” kene Salihin.

Sarami manat ni Salihin, ike turah di we mu nos website mumake “Gayo” keta i boboh keterangen ike Gayo ni geral ni suku bangsa i Indonesia i Provinsi Aceh kati beteh jema i seluruh denie ike Gayo ni nume kekata porno.

Pun bese, i kangkuie ike Gayo perlu i promosin ku denie luer, carae tentue urum internet. “Dele nge si mubetih Gayo kerna dele nge informasi wan internet,” kene Lihin den i kangkui e ike atas situs si gere jeroh i engon mata ne pihak Lintas Gayo nge mu najun keberaten atau komplin ku pihak terkait buge tir i tutupen situs oyane.

“Oya we manat urum peniron ni kami, buge nguk bersisawahen,” beta pemarin kene Salihin Putra. (Aman Zaghlul)