Oleh : Bahtiar Gayo/ Wartawan Waspada
Uyet
Sikerna uyet mutik ken uwah
Mungenal tuah iwanni bumi
Bier kemaro bersapih turah
Kejang payah buge muarti
Ike uluh urum wih nge kite rike, kuneke kite kaji tekik persulen uyet???? Uyetni bayakku, mahluk Allah si termasuk seber, tabah dan ihlas. Gere betehe uren remo, nik ni lemo. Bierpe kemaro muganti lao, uyetni gere berede tetap berbike, mungenal rues ken penaru kati enti layu ko bunge mala, kati mujadi mutik ken uwah, buge ken tuah nemah ni dene.
Gere mungkin anakku, uwah nguk tasak, melak ni heme. Gere mungkin gaeh si lemak lungi, sisedep iawah, musera ku delah. Mehne kerna ketier uyet wooo tajuk rejeku. Mupacak ku bumi mujantang tegep, mujolor lagu nipe, mumerah penurip ken jantung rasa.
Asa ihlas uyetni bayakku. Gere ipekeri uyetni kune dirie. Gere bejenta, bier kemaro. Wan kemaro ni kawan, asa mehne elet, gere terharap rejeki ni uren. Bierpe beta, gere munyerah, gere surut, gere takut, uyetni tetap mungenal nefkah, kati ulung tetap luhu, mupucuk lemi. Uwahpe enti ku suppit.
Tegep ni kayu anakku, kerna jeroh sigep ni uyet. Makin atas kayu ke turah makin keras ihempas kuyu. Turah makin tegep uyet simanjang ku bumi. Subhanallah, relem olok falsafah uyet ke kite pane murikee bayakku.
Ara keperhatenko uwah si lemak lungi, si melak ni heme? Nge pasti sedep iseder jema, uwahni si puja urum puji. Ara kepenge ko penah ke iseder jema? “berejen ko uyet, si kerna ko mujantang tegep kati kami nguk mangan silemak lungi.”
Gere penah ilen kupenge heme ni meren berejen ku uyet, si munaso uwah sisedep iawah. Sediken pe ara bayakku, mutentudi we jemae si meren berejen ken uyetni. Ini pelejeren si murege ken uyet, turah ihlas. Ketier ni uyet gere bang daleh uyetni si munikmatie. Gere ke beta ya opoh ulesku?
Kuncie mehne iate, ara kasih sayang. Gemasih papa, setie mate, ale sebenare pas pedi kona ku uyetni bayakku. Mehne mera ibuetne bierpe ku nyawa, asal mujadi kao motik ken uwah, berpaedah ku heme si dele.
Falsafah uyetni turah musera ku jantung limpemu bayakku. Beta we kope enti bebuet kerna mukerna, kerna ara siharap. Depet puja urum puji mulo, baro tetahko buetta. Kuenei ku ate kucakmu buetta ihlas ke iperagihko kerna Allah. Ke Ihlas nume pahala pelin si depet ko jantung rasa, hasil ni buetape ara faedahe ku diringmu, ku heme si dele.
Ke ihlas atemu bayakku, enti lagu jengkat gegiring. Enti lagu kedidi paya, lumput kini, tragong kuso, nyut gere bererede. Munorehen salak si putih, mehne buetni turah kerna ko kati mujadi, enti ara sipet oya boh bayakku. Biperpe geh carut marut, cumun ni heme, ke kao ihlas wan buetni dan jeroh bermanfaat enti surut bayakku. Ingeti ko uyet sigere pernah surut wan moreppe demi mutik ken uwah.
Anakku, Tajuk Reje Daling sesenku puren!!!
Uji ibeningko tekik, ara syair ari Amalah Kenawatmu, si munaos denang wan manatku ken kam itulisen Tajuk Reje (2). Hana tamsilen Amalah Kenawatmu?
Sediken kite kin uluh biang
Tungku murues kin titi ni tete
Ari kaul ni ate kin kao anak ku sayang
Turah ku gingen ike tuke mulape
Gere kami i roi porak urum uren
Sediken kami mungenal rezeki
Buge puren anak ku kin pelongohen
Sisu ku sawahen ku waih si bengi
Mamur ni alak ku gere ne terkaji
Mungaul ni kao mungenal rezeki
Buge amanah ku nguk kin tawar bengi
Kin inget ingeten mu ike aku nge i tuyuh ni bumi
Relem anakku falsafah syair Amalah mu ini, betale jema tuwe ken jantung rasa.Bierpe berbantal siku, ken penemis nome, ken kao bayakku turah we iketieri. Bierpe turah beluh nyawa, ke uyet bayakku gere terih ku mara.
Muselpak ni cabang, sediken turahdi we murongkom, uyetni ihlas bayakku, munaru ruesmu kati mulie ipanang jema. Uji ibeningni tajuk rejeku, kenge musera ku jantung limpemu, len iktiber ku tetah mienne.
Sambungan :
Manatku Ken Tajuk Reje (1) >(2) > (3)
