(majumi ko pendidiken tanoh gayo)
Oleh: Radensyah*
langkah si jeroh se ini kulagang,
pora kudenang peri wan seni,
ku simude ini enge terang,
kata kurentang kati belangi,
“besiloni…..
Bunge simutik nge daboh mukemang,
belangi mugerbang ke kite engoni,
isirem lemi yup kuyu mulingang,
beta bayang bayang wan pendidiken ni,
“sekulahni….
Mumerah ilmu bermacam bage,
kusi terang nate gelah ijeleni,
kusi jeroh gelah musampe,
bier sanahpe turah isunguhi,
“lagu syair ni…
Sekulah munamah ilmu,
nge terang perlu iwani muripni,
dele pemetihen iwani ulu,
kusihpe mutumpu tetap igunei,
“oya hakiki…
Sekulah gelah semperne,
rajin mungune kati mungerti,
idesi murip wan tengah mude,
enti haho-haho gere bertali,
“ipekeri…
Bahasa inggris kuboboh umpama,
nge sareh nyata kite besiloni,
kupenge manat nabang rom aka,
opat kata “the time is money”,
“don’t happy-happy…
Belejer kite entine lale,
nge beta resame iwan muripni,
boh enti renah nilai ni pake,
kemampuenpe turah itetahi,
“jangan gerogi…
Turah seber ke kite sekulah,
gelah tabah serta ijeleni,
bermacam bage bentuk ni masalah,
gelah kite tetah orom rendah hati,
“jangan emosi…
Gelah jeroh itunung jelen,
kuarah kuen bewente rami,
Agama boh kite tingketen,
ibadah enti lupen gati mgungaji,
“enti kukiri…
Kin urang tue gelah muninget,
sidele berbuet kin buah hati,
berketier wae gere kiset,
penting hakiket kati mujadi,
“balas budi…
Bergaul kite gelah pane,
orom paongpe gelah sara hati,
urum sudere enti cere bere,
bersatu bewene berkomunikasi,
“jangan sendiri…
Pendidiken gayo kite tingketen,
murum sepeden bewente rami,
gelahmi maju bang kase puren,
bersitunungen munetah gayoni,
“telesen diri…
*Mahasiswa Semester VI Jurusan Tarbiyah Prodi Bahasa Inggris STAIN Gajah Putih Takengon. Beralamat di depan gerbang tugu Radio Rimba Raya, Kecamatan Pintu Rime Gayo, Bener Meriah. Email: indigondg655[at]gmail.com
