Ninget gempani juh pemekerenku, dak akalku, gere sawah kekireku hanati deba depet bantuan, mede sigere pe. Hanati sigere rusak berat nge wan data manyo, pusing mekere. Gelah simunetah tentumi nukumne.
Menurut Khairul Asmara, wakil bupati, pakeni rum rombongan ben we mari rapat koordinasi rum BNPB. Kemana selepais, oya kene pak wakil, nge le isetujui sitareng maring ni. Si 59 Pokmas mane gere jelas, seni gere neh begantung gere betali.
“Selapis BNPB nge setuju, taring itetah ku Direktorat keuanganmi. Buge rapat BNPB rum direktoratni, mudah-mudahan, teriselsen pakeni. Kamipe sedih mupetimangne. Gere ara niet tekekpe ara anak kandung rum anak tiri, mehne des, turah iperjuangan,” leng ni Erol nipe nge lungen kemering te mengee.
Begi jema dele si kona musibahni, ke macam berbagoi curakke. Mehne kenake depet, ke betawe, gerellepe jema niro. Ibarat mujolok, sa mubetehe ruluh. Wan mugelice datani, ara si “ newei genting”, boh kune akal lagu peri sine, bierpe le gere muremak umaha, kune kati depet bantuan.
Ara si jeroh tarekite si korban gempa ni. Deba nume hakke, gere mera imaie ku umah ken ton ibadahhe. Iulakne jeroh-jeroh ku BNPB. Senie nge turun tim BPBD Aceh Tengah ara sinulak danani. Tim turunpe asa si mersikke, ara ke jaksae rum pelisi. Nosah keber ku simusibah, boh kegere rusak, ta nge salah “elom”, kune akal kati ulaken sen negara.
Si syeriet te belangi, tarikete teger, bicer mungenal gantie. Gere mera ipanganne sen negara si nume hakke. Ara deba atee nge gere rane, tir ketierne gantie. Sigere meh pekir kite, si nge salah “jerib”, arisi mah gantie? Oya si ejeb mupetimang ne.
Oya sine tabiet si korban, macam berbagoi oyape, sijeroh syariete ta ulakne nume hakke, siberhak ta nuntut hakke, kune akal kati demu. Ta si namat ulu parang len mien sejarahe. Gure asa cerite, ni namat ulu parang lagu berganti ayun ku tempeh si “porakni.” Eeee kune de, ta kejebmi kusamung. (Bahtiar Gayo)
