Si namat ulu parang, si netah tentu persoalan gempa Gayo, oyape gure sejarahe. Ken kepala BPBD ni lagu usik perasanku. Senie gempa dak ku besiloni, nge 3 jema beganti alun munamat stempel. Ara si kerna sakit (Subhan Sahara), itetah surut, beruwak mulo. Subhan ipinah ku ton silen.
Geh gantie Teuku Alaidinsyah (Ampun) munetah benang gasut, buge pas ulaken kuelangan. Ampunni pakate jaksa rum pelisi, nyawah keber ku rakyat, buge sen negara singe terlanjur iosah ku sigere berhak nguk bang iulakan mien. Deba asa si bersih ate nume hakke, kemana iulakne.
Deba nge ipergunen, te kune male nulakne? Hana ibubun ken penggantie, oya si ejeb mupetimangne. Ampunni pe telase usik namat kerenem BPBD ni. Gere mokot tu pas kecalne buwetta. Wan geda gedi kuso kini, itetahe surut. Entah muruwi bang kersi, mukosim bang meja sioah ku Ampunni, kati tetahe surut?
Mukune de itempeh oya, kati mangik jemae? Lagu gere jenta? Kul tu ke buwette ione, ara ke marae kati lagu usik pora si munamat tapak kerenem? Wan geda-gedi mukeber Ampun surut, dipercayan mienne ku singuk munarang nemah atan kerlang. Seni iserahen ku Jauhari.
Lagu mehne elit le buwetni. Ni rakyatpe (korban sigere depet), nge pasti rane atee, selo bang mis nome. Ni jema kemana nge temetap tonne belongoh. Gere berdaring ilao ibasahi uren. Nise sar-sur kuujung kuralik, munetah cara buge kati des urum si len. Nipong hanati depet, te naku si kunehen. Nge lepas kite rasa wan atete begi jema si lagu ini. Murum-murum musibah.
Munetah cara, sentur kini, kadun kuso, kune akal kati tir iperjuangan. Nge ken sejarah bang buwetni, entap gempani ine ni rakyat nge iserbu. Itiro tanggungjewebpe ken rakyat. Te sanane, hukum jema dele. Mugerutup gegasak, nge matuk gas air mata. Ara siluke, turah dokter munangane. Isangkan ku umah sakit.
Umahni rakyatpe nge renggelak. Asap mujebul, kaca meh berpecahen, ahere ine ni rakyatni turah minah sidang ku aula Setdakab. Bupati pe ihasap. Sawah kupendopo, nge ionepe ara seje ceriteni. Sara rowa kaca nge tiroe ganti. Mukeru, run kini, sangko kuso, gere beteh si demo ni hek.
Sebelemne nge italu Bupati Nasaruddin, ari BRI pe nge nosah keterangan. Bier bupati nge nosah keterangan, wan gedung rakyat, telase gere tumung pakat ilen buwetni. Betawe ken reje ton kapur sesak, ton rakyat mungadu, kegere ku ama ni rakyat ikadun buwetni, ta kusahmi itumpun luke ni ate.
Manat jema jemen, reje turah pane kunul iujung ni tanuk. Pane mupetimang basa, ke nulakpe reje gere rum serde kolak, ke mubesikpe gere rum perampat si luwis. Oya nge manat ari datu te. Demi ken tanoh tembuni ke turah ipejaramuri manat ari muyang te.
Ate kenge muligen, selo bang temas sana sibueten, ike gere si hejet pinte musampe ilen. Si korban gempa geh mien alun segermi kuumah rakyatni. Te sana ne, begi jema dele, selo bang mehne nguk ijege, nge mugerasak mienne.
Lagu peri sine, ara deba “pane” nerah momen, te lo male ku pemilu Caleg, kenge ara seje tingkah ni didongni. Musesemet nye buwetni. Seger mah kedaheso demo gempa rum demo politik. Oyape mukeru mienne, ruang sidang DPRK iaula Setdakab nge mutamah pecah ine ni rakyat.
Ine ni rakyatni sikedaheso nunung bupati, nuntut KIP ku Pengadilen, gere urum wan sidangni. Kenge tiwel bang sidang ni. Undangan, tenah mutentu, gere geh we pakeni, sidang ke turah ilanjuten. Nge maken gure cerite gempa ni. Kune de kisah selanjute? (Bahtiar Gayo)
