Kusamung ta tekek mi sejarah gempa Gayo ni. Tabi mulo, mulanih pora ku tulis, kemana gere sige tu rembege ni, mubenger pora. Utang ke janyi, ke turah ilunesi bang.
Asa gempani naru kisahhe. Entap ni gempa, seger mah rum muatan politik, kenge bang faham kite. Ara seje si sikerkes. Begi sidang si tiwel, delenen wakil ni rakyatni gere urum wan sidang. Sidang iuke, lagu perjak-perjak tomang.
Iuke, gere genap jemae, skor mienne. Uke mien, pebebata buwetni. Ahire kene pakeni, sidang ilanjuten nge sesuai rum tatib. Te kenge dabuh “kemuhen” mienne. Ger ni palu, lagu-lagu male terbang di amat Nazar, si mimpin sidang. Meja lagu male mutemak, gedam gedum ni palu.
Persoalan gempa, pelantiken KIP, pacu kude, sawah ku gere pecaya neh ken reje, nge timul wan sidang ini. Sawah kantor bupati isegel rakyat, kenge meh buwetni. Museget pora asa. Petugas ari BRI pe male ken keber, male ihasap rakyat sigeh wan sidangni.
Bierpe pe le seget, ahere ku bengi we. Ni korban gempa ni, kenake tir senna isaluren, enti le tu persyaratan, kerna ringit ni nge ara I BRI. Tumung pakat, ruang komisi C DPRK ke kantor BRI kejeb, munyerahen daftar penerime bantuan.
Buetta gere ngen oya pelin. Alun demo pe gere berede. Ahere tumung peden, Ketol rum Kute Panang si olok musibah, oya imulun penyeluren bantuan. persuelen persyaratan si beret irasan korban, oya areh-areh itetah, sipenting administrasi lengkap puren.
Bantuan nge isaluren, sayang gere rata mehne. Kelompok si 59 si nge terdata, gere ilen isetujui BNPB. Nge mucerite mienne. Gere bang benang gasutni ulaken kuelangen.
“Kite berdoa, buge Dirjen Keuangan, menyetujui pencairan dana si nge iusulen upake BNPB. 59 Pokmas si tareng mane, nge isetujui BNPB dan nge ikirim suret ku Dirjen keuangan,” kene Khairul Asmara wakil Bupati Aceh Tengah.
Erol, beta jema dele munalu gerel ni wakil ni, muniro ku korban kati temetap, berdoa kusi sara, buge si 59 Pokmas ni desne urum si len, depet bantuan ken netah umah si nge rebah rimpah.
Ke si nguk ikatan si gere musibah, atau gere beret, kemana nge iterime bantuan, lebih jeroh ulaken ku negara, kati nguk ipergunen ken sederete si betul berhak. “ Aku yakin suderete rum ate putih si nume hakke, gere iwetne. Alhamdulillah dele nge si nge nulaki sen ku neraga,” pinte ni wakil bupati.
Dak selo ke pakeni benanti persetujuen Dirjen keuangan? Oya si gere pas itentun, te buet jema nukume. Begi si namat ulu parang, munetah tentu ken rakyat, selo bang berongot pelin munanten keber. Turah gati ijontok, gati isinoi.
Ke gati ikekune, gati isinoi, gati bersiteken cerak, berperi basa, kemana jemape ke turah bepeker bang, ken si musibahni. Si musibah nge le betenah utus ari Medan, munetah ton nome rum ton musilu. Ke ama rum ine, ber kul ate ken anak, selo bang ranap nome, ike anak gere ilen itetah tentu.
Nguk bang kite derasan ate ni anak pegegiep, nengon ku jema nge tak tok meling palu, mumantik suyen, berseding rering. Musibah oya kuasa tuhen. Gere ku tiro beir gere rejen. Kukunehen ko tubuh beden. Nge beta bang kisah perjelen. Kite erah mi kahe kune de kelanjuten sejarah gempani. (Bahtiar Gayo)
