Oleh; Bahtiar Gayo
Sapur kenge mata munerah
Gere teridah bang kuning ilang
Lagu kuson-son abang gajah
Sana sitamah nemah ni kerlang
Enti itetah serit lelewah
Beret muluwah gasut ni benang
Deletu uwah ahere mutewah
Turah muselpak ko ranting cabang
Nesu ni eges nge makin teridah
Mera ku dewe sudere musirang
Gere ke pues istana si megah
Daleh neh uten abang ipancang
Ingeti rakyat gelah amanah
Penemah langkah atanni kerlang
Simemude mi osah benemah
Gere bang mehne turah ku abang
Jarak mi sipet oloh ibelah
Ara si perjak semelah itatang
Ku usi diri gere bang teridah
Ike ku jema mata nge ilang
Belangi ni parang kerna bekelah
Belah ni kayu turah ku galang
Buge mutuah pangkat si megah
Munemah manat bejangkat kerlang
Ingeti tuhen si kite semah
Doa tulus iwan semiyang
Ike hakiket ku kite sawah
Sana si ara mehne kabang
Takengen, 8 November 2014
Penyair Wartawan Waspada
