Redaksi Lintas Gayo.com, niro tulung ku wartawan senior. Kune akal ara bang tulisen si berbasa Gayo. Tujuen kami, kati ara si munosah komentar, kriteken, saran, pendepet, kati basa jemen tengahna si nge le male “tareng labang”, ngu bang iulaki.
Redaksi niro tulung ku Bapak Bahtiar Gayo, buge isempate waktu nguk nulis berita atau cerite berbasa Gayo. Memang ejeb nyawahne, karna gere besanahpe, enti mulo ken pulsa ni amani, ken rokoke pe gere pas kami osah.
Alhamdulillah amani demi ken Gayo, kati basa teni nguk ibeteh si memude, bierle gere kami sapu alake, kemana atewe tulus ilen, mera nulis. Ta ini tulisen ne mungkin ara musidah episode. Berejen.
Gempa Gayo, Ngen Si Nge Kisahmu? (1)
Gerak ari tuhen takeder ari Allah, gere ara munusie sitemus kekiree kune de perjelene muripni. Langkah rejeki petemun, mut, oya si sara wo nukumne. Nume heme si berhak mutusne. Betale kite morepni.
Nge lebih setun, tanoh tembuni iantus gempa. Dele asa umah si rebah rimpah. Mesegid pe mede si muhempas ku bumi. Musibah kul iosah Allah. 2 Juli 2013 nge ken sejerah. Reta ken sanyam nyawa, kene jema tuwe jemen, ara ilen oros. deba ara suderete sawah seni gere tebetih ilen isi tulen amis-amise.
Nge beta bang retak ken ko Gayo. Nge lebih setun, tahap rehap rekonpe nge le berjelen. Deba dele si nge betetah. Umahpe nge bepantik mienne, sekulah, mesegid rum sarana pemerintah, kemana nge le nguk mufungsi mienne lagu tengahna, walau gere bermeh ilen tetahe.
Ken Aceh Tengah pelin, gere manyo Bener, si korban umah ni penduduk sawah 16.403. Singuk ikata si rebah rimpah mususun ku bumi ara 4.142. si rusak sedang simen oyape, 3.827. Ke rusak ringen, asa mudele pora 8.434.
Begi musibah si osa Allah selo bang bepilih. Seger mugerutup, ulak ku empue. Si mujadi persuelen, ari 4.142 si rusak berat, gere mehne depet bantuan si janyin pemerintah. Ari data BPBD Aceh Tengah, ara 275 umah suderete sigere ilen depet hanahpe. Keta si rusak sedang sawah 738.
Ara 59 Pokmas sigere jelas kune de nasipe. Pakeni desne nasippe urum sudere sidele, musibah gere terelakne. Sayang penadi ke kite beningen, nguk pakeni tareng kapal. Silen nge depet bantuan, nume ken netah umah pelin, dana cash for work pe nge le iterime.
Entah kune bang tetahe, kati pakeni gere ikangkui BNPB. Oya gere ilen kite cerite ken umah si rusak ringen, sawah 8.434, kemana dak serloni gere tebetih ara ke perhatian ken pakeni? Mutetir ilah dene. Kemana nge le isapati. Oya seni tengah iurus pakeni, entah kune kase haselle.
Eyaaaa nge sawah kupi pit ini, ta aku minum mulo. Ku jerib mulo eeeh aku ge, kejebmi ta ku samung. (Bahtiar Gayo)
