Senie num kupi, nge mujinger pora, kusamung bang tekikmi cerite te ni. Pas kite rasa idema ku ate te, kune de suderete sibetul kona musibah, nerah si kuwen kiri depet bantuan ken netah umah? Te nise sikunehen kati gere depat. Eya kenge bage irike, ate diri te mi we mupetimangne.
Hanati BNPB gere kangkue data si 59 Pokmasni? Laneh ikerem ke? Atau ara si salah, atau kune persoalanne, oya si ejeb ilen mudepet keteranganne. Wan mugelice datani, tengah wan tetah male ikirim ku BNPB, angka ni nek rerenye.
Pemulo nge le tumung pakat, angkae 14.000 lebih, umah si kona musibah ken Takengen ni. Si mudata nipe gere jema tehnis. Iserahen ku reje kampung rum harie siara itempat. Tulis seje hana de salahe, deba niro iayo ku beret, musedang pora nye ringen. Asa nge beta buwetta gere ara petunjuk tehnis. Kenge murakul ujungnge.
Mutemah mienne gempa silih berganti alun, temakin nik angka sine. Eleh beta sine. Deba ara si beruki buwetni, mutamah nisepe. Ara sigere rusak, ta wan data nge rusak. Aduh abang, ara seje peloh ni kiteni. Deba nge dekat kurara itetah cara, gere musibah ta itulis rusak berat, lagu si galak ate niro mienne geh gempa.
Ara singuk peren pora we musingkih suyun tajuk diri, nge kona rusak berat. Ke itilok sara-sara, ke pelisi rum jaksa serius mudata ulang, aduh ineee mera murakul buwetni, gere lulus Paya Ilang so, turah itetah Paya Ilang len.
Kekite beningen, lagu sigere konatu buwetni. Angka dan data gempani penyebebpe rerenye nik, akati taring maring buwetni. Ken data siarape (singe ikangkui pemerintah puset) simen nge dana si tangkohni pemerintah. Menurut Jauhari, kepala BPBD i Takengen ni, Ari BNPB nge sawah Rp 216.400.000.000.- eyaaaa gerle jemae nerah angkani. Gere ilen ari provinsi Rp 52 milyar. Nye ari dana APBD Rp 19.155.000.000.-
Ari dana BNPB kedaheso ara muutang ilenne Rp 25 milyar lebih, itamah sen CFW sigere bersalur ilenne sawah Rp 3 milyar lebih male sawah ku opat. Ni provinsipe tose lagu, entah kune ken iancar-ancar buwetni, nge lagu kredit. Mutang ilen pake provinsini rum janyi nge isawahne kurakyat. Murasa pora sawah Rp 30 milyar lebih. Simen kite erah angkani.
Oya parie buwetni. Dana si nge sawah ku si musibah mumede. Si sayang ara sigere ilen mutekus pe rum dana ni. Beperus dede deba suderete sigere manyo wan data. Si sayang nume sana, suderete si betul-betul musibah. Hanahpe gere pat pergunen, dabuh gere manyo wan data.
Lagu mupilih kasih kedahneso buwetni. Lagu mubelah uluh, sara itatang sara iperjak. Buwetni nge keruh tar ulu, oya muligen, keruh we sawah ku kuala. Eee salah bang lingku ini, hehehe tabi ta. Bergigih kejeb boh, kahe ku samung. ke cocok ya? Bahtiar Gayo
