by

Cinta

         Oleh : Bahtiar Gayo Bahtiar Gayo

Kisah ate ini male kurike
Gere mu wujud lepas irasa
Titipen tuhen ku kite heme
Penetah morep atan ni donya

Mehne heme murasa cinta
Deba lagu serge ara lagu neraka
Deba senang depetne bahgia
Gere kurang si morep sengsara

Cinta nge ara masa Adam rum Hawa
cerite Peteri Bensu rum Malim Dewa
Sawah ku kite ken kisah nyata
Mehne heme turah ara cinta

Asa insen bekenak bahgie
Terasa hemus kuyuni serge
Toan musilu rum bermenye
Penorep semangat pembangkit jiwe

Ike cinta nge mu ayun-ayun
Gere mesing ku porak ni rara
Ku kuyu halus isawahen sisun
Rela berkorban bier ku nyawa

Mehne ibueten demi ko cinta
Hancur beden isedien nyawa
Mehne iosan sana si ara
Igeng nyanya demi ko cinta

Aaaaaa Ke kona cinta neraka
Mubara ate ujungnge mara
Rembege morep jiwe sengsara
Gere terih bier beluh nyawa

Kasih sayang muubah petaka
Hangus reta beluh sana si ara
Gere ara suluh si mucahya
Bekalang nyawa mata mubota

Buge kona ku cinta bahgie
Enti sawah bang cinta ku bele
Syariat ku tuhen turah ijege
Gere mokot kite morep atan denie

Enti bang kona ate si luke
Ujung nge bele pecah sudere
Osop sayang bene kekire
Tubuh morep nge osop jiwe

Ike kona cinta serge
Isyukuri nikmat ni tuhen
Ike depet si gere setie
Buge nguk ken pelejeren

Bierpe luke turah ihklasen
Serahen ku si sara nukum pekara
Cinta oya rahmat ni tuhen
Jelente munuju ku alam baqa.

Takengen, 13 Oktober 2014

** Penyair; Wartawan Waspada tinggal di Takengen.

Comments

comments