Oleh : Bahtiar Gayo
Gere penah ku betih dosa urum salah
Laing ari ama ine dor ku tungkah
Gere ku idesi murip ku nge salah langkah
Laing si gere layak patut dor bersorah
Gere penah ku pengen Ine Laingmu
Dor aku bengis ike mokotu munuke pintu
Wan tubuh tue rupe mu si nge layu
Kin laing sorah ku mamur ni lauh mu
Seni ama ine gere ne ara
Berbage penyesalen kurasa turah
Ari kena gere penah aku mumenge amanah
Segele hejep nge kuterime ari Allah
Seni kusih pe ine kuperahi gere ne ara
Ku talui ine gere mesut sara patah kata
Porak lo kelem ku nyatai gere berjenta
Kupen ine nge taring i alam si mubeda
Penyesalen ku gere terperinen
Hancur ni ate lauh rembebe ku amuren
Mubayang aku dor iwani tumpiten
Munekul ni aku urum penuh keseberen
Ine seni taring tanoh ni kuburen
Ulu ku tungkuk urum lauh beramuren
Murip si legih jarak ari biak serinen
Gere mepat ne si kutuju osop ni tungkelen
Ama ine nge naru aku bersebuku
Nge kering kering basah mamur ni lauh idagu
Maaf ni ine- ama segele kesalahanku
Buge ine ama wan serge tempat mu
Osop nge bene siberkasih sayang
Gere ne ara tungkulen seserenen
Dor ku doanen iwan mari semiyang
Buge lapang kubur serge tempat mu puren …..
Allahuakbar!
Penyair tokoh Pers di Gayo Lut
