Tulu Ingi Urum Atlit Gretan, Pemanganen Awal Tenege Oshkosh

Sabang | Lintas Gayo : Sekire mari megerip, Kamis (19/5) hape Cineku meling “denang ni Daman” kububuh kin pentalue. Inewo rupen biak, Abang Khalisuddin Aman Zaghlul ngirim sms atau short message service ike basa pake Inggeris. Kerah we seni nge mujadi bos ni atlet sepeda alias tukang geretan atau geritan, barik sana le tenulisenne si penting gegeriten si pake kayuh urum kiding a.

“Geh kini yoh” beta le tenulisen ne. Waktu oya aku tengah wan umah selang i Balohen Sabang. Memang sebelumme ara i telepone aku, kene we nge  i “Pulau Makam Aulia Keramat 44” ni urum 30 tukang geretan, male munurumi Kejurnas Balap sepeda Gunung, Sabang Mountain Bike Open Championship 2011.

Muloe sms e kubeles urum senne, “kune ya, aku terih kekelam i dene, kenaku. Tape mari oya aku renye begerak bierpe gelep. Pakea beringi i kantur Dewan Kerajinan Nasional (Dekranas) Sabang, sekiter 12 km ari Balohen, persis i geniring ni lut.

Sawah kone muke cerite masalah kekanak si male urum balap sepeda. Demu pong-pong len pe, ara pengurus ni Kempo Acih Tengah Bang Zulkifli alias Arika Kute Beranang, tukang senum Munawardi, si selanjutte kene pakea we si natur stamina ni peserta. Ara beberapa upes pe si mudemu one lagu Briptu Aidi, renye Briptu Anto, (anggota Polres Aceh Tengah). Rupen pakeni pe male urum betanding.

Ike biasae sikubetih upes ni ke jonong dirie, tapi si roani kerah tirdi akrab urum aku. Perasanku gere mah e pangkate waktu becerak urum aku, tapi lebih ku cerite sepeda, ngaro, dan sebagai e, pokok e nge lagu sudere kamipe. Ara mien Fadli, ke rupen oya pe tetangga i Belang Kolak Due.

Singket cerite murum renye aku pe kelamma nome one. Enti kase bayangen nome bekasur, bantal pe grara, nongpe tas beu sewe kububun kin bantal. Ni kekanak rawan pe beta, kekanak beru keta ara ruang dirie i tingket due. Ntah sana kati gere i hotel pakea nome, entah gere mudana ke ? Oya mi weh, kebere memang pakea geh ku Sabang mumake sen pengemasen ni Pengcab Ikatan Sport Sepeda Indonesia (ISSI) Aceh Tengah, cumen nampak e gere genap sehinge turah kumpul sen ken dediri. Ninget aku basa jemen, “Teng eteng iyak mah kero ku Juli, sahan gere mubiak mah kero kedendiri”. Beta le kedah pakeni luah jaluh lagu anak tiri. Memang seba pakeni rupen anak yatim sentan kuselidiki. Akhere ke terpaksa nome wan lante, memang ara tilem tipis isedien panitia.

Langnea, aku pemarin uwet neme, soale kelamma becerite sawah jem tige urum Khalisuddin, jadi selo ne mera mis, kupi nge i suyung. Kebetulen kami ngupi i warung ni urang Gayo geniring ni pante. Khalisuddin mah kupi Bergendal, ke cocokdi ya, te isien jarangdi demu kupi lagu oya, kupi ni pakeni we, oyape rasae nge macam jeroh. Kupen dele mah abang Khalis ni Kupi ni ara pepien bungkus. “Male kuosah kin tene mata ku pong-pong si geh ari deret. Tene besudere, kadang tesana-sana muninget we kin kite,” beta kene abangni ku aku.

Senta wet nome kerah pakeni ara si nge senam, ara si nge mugolo geretanne. Taring aku pejejik unang-unang lino. Mari merup, kuerah ara kero bungkus wan tas asoy. Wan atengku, ini jatahkumi we. Renye bekekire akupe kenduri soboh sesereng. Sentan ku uke bungkusse, rupen pong keroe biasa-biasa we. Tenaruh rebus sara tokot. Sipet ni melape akhere kelabahen meh nongpe roa bungkus, malum pesak ni rembegeni kaul pora, kero pe memang tikik i bubuh mamak Gayo si mujuel kero kin rombongen.

Kelem selanjutte murum mien aku urum kekanaka, berakah-berakah muloi akrab aku urum pake bewene. Kerah bewene jemae sederhana penampilen den pecerakne. Senta kukune-kune, kupen seba gere berine ama, dan mubilangen si nge mokot i taring ni ama.

Sebelemme nge kubetih pakea tukang geretanni rupen nge gati menang besepeda tingket nasional. Contoe  i Lubuk Linggau, Sumatera Selatan pe pakea dele nemah piala. Ike tingket Aceh, nge kite penge murum-murum awak ini juara umum i Porprov kesebelas i Bireuen tun 2010 mane.

Ulak ku cerite manganne mien, langnea kero bungkus kucak ne mien ipangan. Soboh selanjutte muloi pertandingen. Pemanganen nipakea lagu si soboh mane mien, seseger iseling urum tongkol kucak den sara tokot kurik putih tok, maksudte gere mujantar. Teba ara pongkero tenaruh mata sapi setengah matang. Seseger osah Munawardi cs awal, kin tamah tenege kene.

Bepikir aku,  sayangdi adik-adikni, grara ke die dana osah Pemkab Acih Tengah atau Pemda Aceh kin biaya ku Sabang. Ike lagu nini we pemanganenne, mungkin ke menang ? Nome pe wan lante. Rupen pakea teba gere manganpe kerna ikeni panitia tir ku lapangen. Kuduga pakeni mera le lemasen kerna kurang gizi.

Sa mudugae, sentan bedabuhpe, langsung 15 nomor demu juara i kelas Down Hill (DH) alias sepeda luncet-luncet wan bur. Jemlah oya termasuk opat pembalap kaum hawa si mubela Riau. Gere pure, oya baro nenongpe kuengon langsung geretan nguk muteterbang. Biasae kuerah wan Anan Google oya gati. Ini kupen urangte pe pas lagu oya.

Ara si mungune, sana kati jema jago lagu oya iosah kin Riau, aturne ke mubela Aceh atau Gayo. Ke geralte si telas. Jadi ara simujeweb, sa ngenguken mubela Aceh tape mangan pe tenaruh we demu alias gere i iroi, ketimang masa depan ni anak yatimni ipikiri. Soale pakeni ike nge mubela Riau, male ilatih kin pra-PON. Jadi kemungkinen masa depanne cerah, nume orop cerah ni kidding kerah se tarif transfer ni pembalap sepeda sawah renye ku 400 iket.

Lo terakhir Mingu (22/5) baro bedabuh pakeni i kelas MTB On The Road alias besepeda wan bur tapi lintesenne naru sawah 75 batu. Soboha pe beta mien masalah pemanganen, tenaruh, malah ara si gere mangan. Kelamea  kurasa ara atlet si gere ranap nome we, kena kiruh ara balap liar, den trafo ni listrik i kantur Dekranas rusak. Jadi lampu den AC mate total. Bayangpe kemuhe i kute porakni? Aku becerak mien wan atengku, ini matdi meh bejerengkangen kase waktu betanding, soale kurang isterhat dan kurang gizi.

Sentan kerah pertandingen  nume wan bur biasa tapi wan uten. One dele ruwi ni tau eneh, seba lagu rangut galang bebelgangan i lah ni dene sehinge ara ban ni pembalap Gayo mupotok. Aku pe renye nunung nik gegirit kredit muboncerng pelatih Riau Amir Mahmud si nge dele nosah cara ku pesertante.

Jema ini pe le pembalap, cumen ike kite kerasi mah honda mera geh gicip ari kuduk. “Pelan-pelan aja Bang, kalau naik motor saya agak takut,” kene jema si nge gati menang tingket nasional dan menjadi pelatih Sea Games ni. Kami teduh i sara ton wan uten, ike istilah ni balap sepeda oya ton “suplay” i one we nguk pembalap iosah minum urum pemanganan. Jadi kerna pembalap Riau pe jemae urang kite, pelatih Riau pe nosah waih putih. Ara teba si nosah awal urum apel kati enti mulape, peldahen dan mutenege.

Yah, nume teni pembalap muputuk ban, gegiritkupe kona ban arape. Akhere igolo arih-arih ku Ibuih, sekire roa batu mi ari lokasi bocor ban. Meh oya terpaksa tempel ban, Amir kukeni mulo urum sedan ni pong. Sawah ku Sabang Fair mi we kubetih cerite rupen dele urangte mujadi juara.  Sikusimpulen, ara 23 demu juara. Ike klop len si geh ari seluruh Indonesia termasuk ara lime pake ari Jayapura grara lagu oya delewe.

Juara satu  ara lime jema, juara due demu pitu jema, juara tige ara opat jema, juara opat ara roa pake, juara lime mien tulu jema mi. Ni upesnepe demu juara opat ike gere salah aku. Ike wan besepeda ara syarat tertentu ibilang ari jumlah peserta, oya kati renye juara lime pe demu hadiah.

Beta le kekire usaha ni atlit sepeda ni muraih juara. Kenake ku arap ara si mu perhatin ne, kerna tenege e kerah lagu motor Oshkosh mah uyem ari Serule. Pelatih Riau dan Banten Dedi Hidayat pe mungakui tenege urum kepanen ni pakeni. Jadi rugi ike pemerintah gere nosah penghargaen atau kesejahteraen kin pakea. Ara sara roa jema we ari jema ara. Den si kupenge mubilangen pembalap si nge yatim dan yatim piatu. Gere ke kene Nabi oya turah kite santuni ? (Lembide Sane Kemang)